Қазақстандық гроссмейстерлер Лондонда өткен әлем чемпионатында шахматтың блиц түрінен командалық ойынға қатысып, күміс медаль қанжығалады.

Бұдан бөлек қазақ жастары Ұлыбритания лордтарымен шахмат ойнады. Бұрын-соңды болмаған достық кездесу Парламент қабырғасында өтіп, екі ел арасындағы мәдени-гуманитарлық байланысты нығайтуға сеп болды.

Әдетте Парламент қабырғасында қызу дебаттар жүріп жатады. Негізгі партиялар: лейбористер мен консерваторлар ел болашағын айқындайтын заң жобаларын талқылайды. Бірақ бүгін олар ойын алаңында қазақстандық шахматшылармен қызу тартысқа түсті.

Отандық ойыншылар Қазақстан шахмат федерациясының халықаралық деңгейдегі гроссмейстерлері: Қазыбек Нөгербек, Әлішер Сүлейменов, Ксения Балабаева және осы ұйымның басшылары. Олар бұған дейін кәсіпқой спортшылармен тайталасып келсе, бұл жолы лордтармен бір ойын үстелінің басында отыр.

Қазыбек Нөгербек, «Барыс» ұлттық құрамасының капитаны:

- Осы жер менің мәңгі есімде қалатын болады. Суреттер бар. Үйде іліп қоямын. Көп рақмет. Маған ұнады.

Қарсыластары Британ Парламенті жоғары палатасының мүшелері: Гарольд Картер, Патрик Лоуренс және Дэвид Уигли. Олар елдің саяси, құқықтық және мәдени өмірінде мыңызды рөл атқаратын беделді тұлғалар. Әдетте лордтар қызметті әкесінен мұра ретінде қабылдайды немесе оларды премьер-министрдің ұсынысымен патша тағайындайды. Тағы бірі Англикан шіркеуінің өкілі ретінде заң шығару ісіне араласады

Дэвид Уигли, Ұлыбритания Парламенті Лордтар

Палатасының мүшесі:

- Саясат пен шахмат ойынында стратегия, қадамдарыңды алдын ала жоспарлау, қарсыласыңды адастыру сияқты ұқсастықтар көп. Сондықтан бұл ойын маған өте ұнайды. Қазақ жастарына тәнті болдым.

Патрик Лоуренс, Ұлыбритания Парламенті Лордтар Палатасының мүшесі:

- Қазақстандықтармен танысу мен үшін үлкен мәртебе. Бір күні сіздерге барып, саяхаттағым келеді. Менің білетінім, елдеріңіз өте үлкен, әдемі әрі әсерлі.

Жоғарғы палата мүшелері дебаттар кезінде ғана емес, спортта да осал емес екендіктерін дәлелдеді. Парламент қабырғасындағы шахмат клубының белсенді мүшелері бірінші дәрежелі спорт шеберлігіне үміткер деңгейінде сапалы ойын көрсетті. Бірақ нәтижесінде кәсіпқой қазақстандық спортшылар жеңіске жетті.

Дәрмен Сәдуақасов, Қазақстан Шахмат федерациясының бірінші вице-президенті:

- Бүгін лордтар өте жақсы өнер көрсетті. Ұлыбританияның шахмат ойынын ойнаудағы бай дәстүрі сезіледі. Шараны ұйымдастырған Қазақстан елшілігіне өте ризамыз. Биг-бенді туристер сияқты сыртынан емес, ішіне кіріп, көруге мүмкіндік алып отырмыз.

Гүлмира Дәулетова, Қазақстан Шахмат федерациясының атқарушы директоры:

- Бүгінде әлемде қақтығыстар, түрлі-түрлі соғыстар болып жатыр. Сондықтан егер біз екі жақты қарым-қатынасты, әлемдік дипломатияны тек қана жақсы, осындай спорт, мәдени байланыс арқылы орнататын болсақ, барлық елде тек қана бейбітшілік пен тыныштық болады.

Парламенттегі шахмат клубы – тарихы тереңде жатқан бірегей зияткерлік қауымдастық. Ол Премьер-министрді, депутаттарды және Парламент қызметкерлерін біріктіретін бейресми ойын және пікір алмасу алаңы.

Питер Хорнсби, Ұлыбритания Парламенті Шахмат клубының капитаны:

- Қауымдар палатасында қазір дауыс беру жүріп жатыр. Сондықтан көп депутат ниеттенгенімен, өкінішке қарай ойынға қатысуға уақыт таппады.

Екі ел арасындағы өзара құрмет пен мәдени диалогты нығайта түсетін осындай шаралар жалғасын таппақ. Алдағы уақытта британиялық тарап Қазақстан парламентінің заң шығарушыларымен шахматтан онлайн турнир өткізуді жоспарлап отыр.

Ғалымжан Қараманұлы