Үкімет басшысы қолданыстағы әдістердің тиімділігі төмен деп отыр.

Премьер-министр Олжас Бектенов еңбек заңнамасының бұзылуына қатысты мониторингті күшейтуді тапсырды, деп хабарлайды inbusiness.kz сайты.

"Адам өмірі мен денсаулығы – ең басты құндылық. Сондықтан еңбекті қорғау жүйесі жұмыс орнында қауіпсіздікті қамтамасыз етудің заманауи тәсілдеріне негізделуі керек. Көбінесе ескірген жабдықтар, жаңғырту жұмыстарының кешігуі, жаңа технологиялардың болмауы өндірістік жарақат алу жағдайларының өсуіне алып келеді. Мемлекет басшысы кәсіпорындарда еңбек қауіпсіздігі мәселелерін шешуді нақты тапсырды", – деді Үкімет басшысы.

Олжас Бектенов ерте ескерту және хабарлау жүйелері апат қаупі туындаған жағдайда жедел әрекет етуге мүмкіндік беретінін айтты.

"Бірақ ең бастысы – бұл адами фактор. Жұмыскерлердің қауіпсіздігі мен құқықтарының сақталуын қатаң бақылауды ешқандай датчик алмастыра алмайды. Өкінішке қарай, мұндай бақылаудың жеткіліксіз екенін айтуға тура келеді. Жазатайым оқиғаларды азайту үшін жұмыс берушілер жарақаттануға, әсіресе адам өліміне алып келетін жағдайларды болдырмайтын еңбек қауіпсіздігін, сондай-ақ автоматтандыру мен цифрландыруды қамтамасыз етуге міндетті", – деді ол.

Сөзінше, қолданыстағы әдістердің тиімділігі төмен болып отыр.

"Қарапайым қауіпсіздік техникасының талаптары ескерілмей жатады. Еңбекті қорғау шараларын ұйымдастыруда бірыңғай тәсіл, ал ақпараттық жүйелерде өзара байланыс жоқ. Сондықтан бір ғана Еңбек министрлігінің күш-жігері аз болады. Бұл барлық мемлекеттік органдардың, әкімдіктер мен кәсіпорындардың бірлесіп атқаратын ауқымды жұмысына айналуға тиіс. Еңбек заңнамасының бұзылуына қатысты, оның ішінде кәсіпорындардың цифрлық картасын пайдалана отырып, мониторингті күшейту керек. Президент әлеуметтік-еңбек саласындағы цифрландырудың маңыздылығын атап өтті. Еңбек саласын цифрландыру бойынша тиісті шараларды қабылдау керек", — деп атап өтті Премьер-министр.