Қасым-Жомарт Тоқаев елімізге ресми сапармен келген Болгария президенті Румен Радевті қарсы алды.

Қазақстан мен Болгария президенттері Ақордада шағын құрамда келіссөз өткізді, деп хабарлайды Ақорда.

Қасым-Жомарт Тоқаевтың айтуынша, Болгария Еуропадағы ірі әрі маңызды әріптесіміз. Сондықтан екіжақты қарым-қатынасты күшейтуге басымдық беріліп отыр.

"Ал сауда-экономикалық байланыстар жөніндегі үкіметаралық комиссия соған күш салады деп білемін. Сонымен қатар біз алдағы уақытта Қазақстан мен Болгарияның іскерлік кеңесі құрылады деп жоспарлап отырмыз. Бұл біздің қарым-қатынасымызды күшейту жолындағы тағы бір қадам болады", – деді президент.

Президенттің айтуынша, бүгінгі бизнес форум мен екі елдің сауда палаталары арасында рәсімделетін меморандум да өзара ынтымақтастықты нығайта түседі.

Ал Болгария президенті Румен Радев алдымен қазақтың дәстүрлі қонақжайлылығы үшін алғысын айтып, Қазақстанды Орталық Азиядағы негізгі стратегиялық әріптес ретінде қарастыратынын ерекше атап өтті.

Оқи отырыңыз: Қазақстанда жоғары оқу орындарына құжат қабылдау 20 маусымда басталады

"Бүгін өзара тиімді бағыттар мен бірге іске асырылатын жобаларды талқылауға мүмкіндік бар. Соған қуаныштымын. Бүгін маңызды меморандумдарға қол қойылады. Бұл құжаттар "орта дәлізді" күшейтуге мүмкіндік береді", – деді Румен Радев.

Осы орайда Болгария басшысы екі елдің стратегиялық орналасуын барынша пайдалану қажеттігін де жеткізді.