Ақтөбе қаласының Абай даңғылында өрт шыққан үй бойынша сараптама қорытындысы бір аптадан кейін дайын болады, деп хабарлайды Zakon.kz.

Бұл туралы сол үйде техникалық тексеру жүргізіп жатқан "КазИнжинирингЦентр" сараптамалық компаниясының өкілдері мәлімдеді.

Бүгін қала әкімі Азамат Бекет үй тұрғындарымен кездесіп, сарапшылардың жұмыс барысы туралы ақпараттарын бірге тыңдады.

"Кеше біз үй іргетасын бірнеше жерде бұрғыладық, табиғи өлшеулер жасадық, құрылымды зерттедік және ультрадыбыстық құрылғылардың көмегімен беріктіктігін бағаладық. Қазір деректерді өңдеп жатырмыз. Конструкторлар дәлірек ақпарат береді. Сараптамалық қорытынды келесі аптаның соңына дейін дайын болады. Үйдің және подъездердің тұруға жарамдылығы туралы қорытынды жасауға әлі ерте. Біз оқиға орнынан алыс орналасқан басқа подъездерде де зерттеу жүргізіп жатырмыз. Зардап шеккен үш подъезде басқаларында қауіп жоқ, яғни, 1, 2, 3, 7 және 8-ші подъездердің тұрғындары қазір өз пәтерлерінде қала бере алады", – деді сараптамалық компания өкілі Азамат Джалмухамбетов.

Қала әкімі техникалық тексеру жұмыстарының аяқталғанын бір апта күтіп, нәтижесіне байланысты қадам жасалатынын айтты.

"Әзірге үш подъезд тұрғындары жатақханада тұрады. Оларға мүмкіндігінше жағдай жасауға тырысып жатырмыз. Сараптама нәтижесі белгілі болғаннан кейін қадамымызды шеше аламыз. Бұл әдейі жасалған қастандық емес, күтпеген жерден болған оқиға. Сараптама қорытындысын сабырмен күтейік. Біздің басшылар сіздермен тәулік бойы байланыста болады", – деді Азамат Бекет.

Сарапшылар үш подъезді ғана емес, өрттен кейінгі толық үйдің жағдайын анықтаумен айналысуда. Әртүрлі негізсіз өсек-аяңға сенбеуді және ондай әңгімені таратпауды сұраймыз. Әкімдік те тұрғындармен бірдей сарапшылық қорытындысын күтіп отыр.