Әлемдегі ең бай адам саналатын миллиардер Илон Маск АҚШ президенті Дональд Трамппен арақатынасы нашарлап, екі күн бұрын жариялаған жазба қалдырған еді. Алайда ол парақшасынан жазбасын қайта алып тастады, деп жазады inbusiness.kz сайты.

"Дональд Трамп — Эпштейн файлдарында бар. Бұл — олар неге әлі күнге дейін жарияланбағанының шынайы себебі. Жақсы күн болсын, Дональд! — делінген еді жазбада.

Бұл жазба әлеуметтік желілерде көптеген скриншот арқылы сақталып қалған болатын.

Америкалық банкир Джеффри Эпштейн адам саудасы мен кәмелетке толмағандарды жыныстық қанауға тарту айыптары бойынша 2019 жылы қамауға алынған еді. Алайда ол сотқа дейін түрмеде өз-өзіне қол жұмсап, қайтыс болды. Іс материалдарында АҚШ-тың бұрынғы президенттерін қоса алғанда, көптеген танымал тұлғаның есімдері аталады. Дегенмен, құжаттардың басым бөлігі әлі құпия сақталып отыр.

Бұған дейін Маск өзі басшылық етпек болған жаңа америкалық партияға атау ұсынды. Оның өзіне тиесілі X әлеуметтік желісінде өткен сауалнамада 5,6 миллион адамның 80 пайыздан астамы Маск ұсынған America Party ("Америка" партиясы) атауын қолдаған.