Димаш Құдайберген Ұлыбритания астанасында жанкүйерлерімен жүздесті.
Қазақстанның халық артисі алдағы күзде Лондонда өтетін жеке концерті туралы ақпарат берді. Сүйікті әншісін көруге әлемнің түкпір-түкпірінен өнерсүйер қауым жиналды.
Ғалымжан Қараманұлы, тілші:
- Ұлт мақтанышы Ұлыбританияда. Фан-кездесуге әрісі Америка, берісі Еуропадан ат арылтып келген жанкүйерлердің қуанышында шек жоқ. Британиялық тыңдармандар әсіресе бақытты. Өйткені олар сүйікті әншісін жеті жыл күтті.
Соңғы рет Димаш Лондонда 2018 жылы концерт берген болатын. Ұзақ үзілістен кейін дарын иесімен қайта табысқан тыңдарман өз көзіне өзі сене алар емес. Олар мүмкіндікті пайдалана отырып, сан түрлі сауал қоюға тырысты. Жарық жұлдыздың сүйікті тағамынан бастап, фильміне дейін білгісі келді. Димаш ағылшын, орыс және әлбетте ана тілінде еркін жауап берді. Әйгілі тұлғаның Диарстарына деген алғысы шексіз.
Димаш Құдайберген, Қазақстанның халық артисі:
- Ол кісілердің көңілдеріне, кіршіксіз, риясыз махабаттарына рақмет айтайын. Әлі күнге дейін менің шашбауымды көтеріп, мені көбірек насихаттауға жұмыстанып жүргендігіне рақмет айтайын.
Диарстар қазақша сөйлейді. Ана тіліміздегі әндерді жатқа айтады. Ұлттық құндылықтарымызды құрметтейді. Бұған дейін Қазақстан туралы аз-кем білгендері қазір елімізге жиі саяхаттайтын болған. Осының барлығы талантымен таңдай қақтырған Димаштың арқасы.
Дженаина Хибейру, жанкүйер (Бразилия):
- Мен бұл әнді жақсы көремін. Өте көп дайындалдым. Өйткені қазақ тілі мен үшін кішкене қиындау. Өзім Бразилиядан болған соң Димаштың елімізге келіп, концертін өткізгенін қалаймын.
Марин Визел, жанкүйер (Израиль):
- Біз бұл әнді отбасымызбен бірге айтамыз. Мағынасын да жақсы білеміз. Тіпті қытайша бөлігін де жаттап алғанбыз.
Димаш кездесуден бір күн бұрын әйгілі әнші Лара Фабианның жеке концертінде сахнаға шықты. Екі жұлдыз “Адажио” әнін бірге орындағанда көрермен аяғынан тік тұрып, қошемет көрсетті. Ал күзде ол дәл осы алаңда ол өзінің “Stranger” атты жеке ән кешін береді. 7 жыл бұрын Димаш Лондонда 3000-дай көрермен жинаса, биыл қарашада 12 мың тыңдарманның басын қосады деген үміт бар.
Қанат Айтбаев, Димаш Құдайбергеннің әкесі:
- Енді осындай жанкүйерлерінің қолдауының арқасында күзде жақсы концерттік шара өтеді деп сенеміз. Амандық болса, көзі қарақты, жүрегі ізгі жандардың барлығын сол концертте кездесейік деп шақырамын.
Кездесу қонақкәдесіз өтпеді. Димаш “Ұмытылмас күн” және “Махаббат бер маған” әндерін шырқап, інісі фортепианада сүйемелдеді. Репертуарын бес саусағындай білетін көрермен де қосылып орындады.
Ғалымжан Қараманұлы
