Жетісу облысындағы 200-ден астам оқушы үш айда 80 жазушының шығармасымен танысып, әңгімелеріне талдау жасады, деп хабарлайды 24KZ. Талапты жастарға ақын Жұматай Оспанұлы және Мұхтар Күмісбек жетекшілік етті.
«Мизам» жылжымалы әдебиет мектебін құрған олар өңірдің аудан-қалаларын аралап, апта бойы дәріс өткізді. Жасөспірімдерді мақала, эссе және өлең жазуға машықтандырды. Әдебиетке баулу сабағында үздік деп танылған 100 оқушы Талдықорғандағы қорытынды кешке арнайы шақырылды. Оларды елге танымал ақын-жазушылар қызыл кілемде қарсы алып, қошемет көрсетті. Кітапқұмар жеткіншектер қаламгерлермен сұхбаттасып, қаржылай сыйақымен марапатталды. Ерекше жоба Президенттің «кітап оқу мәдениетін орнықтыру» тапсырмасы аясында жүзеге асты.
Жұматай Оспанұлы, ҚР мәдениет қайраткері:
- Енді бұл бұнымен тоқтап қалмау керек. Бір сәттік іс болмау керек. Әдебиет әлеміндегі жұмыс ол жалғасын табу керек. Әрі қарай санын да, сапасын да көтеру керек. Ол үшін, әрине, аянбай еңбек ету қажет.
