Қазақстанның бірқатар өңірлерінде 3-5 маусым аралығында ауа райының күрт құбылуына байланысты дауылды ескерту жарияланды. Бұл туралы "Қазгидромет" РМК мәлім етті, деп хабарлайды Skifnews.kz ақпарат порталы.

Астанада 3 маусым күні таңертең найзағай ойнап, күндіз бұршақ жаууы мүмкін.

Ұлытау облысында да дәл осы күні найзағай, бұршақ және дауыл болжанған. Жел оңтүстік пен оңтүстік-батыстан соғып, кей жерлерде екпіні 23 м/с-қа дейін жетуі ықтимал. Сонымен қатар өңірдің оңтүстігінде күн қатты ысиды – ауа температурасы +36°C дейін көтеріледі.

Қарағанды облысында, оның ішінде Қарағанды қаласында да найзағай, бұршақ күтіледі. Жел оңтүстік-батыстан соғып, кей аумақтарда екпіні 20 м/с-қа жетеді. Батыс, шығыс және оңтүстік өңірлерде өрт қаупі жоғары болады.

Батыс Қазақстан, Ақтөбе, Маңғыстау, Атырау, Ақмола, Абай, Шығыс Қазақстан, Жамбыл, Қызылорда, Павлодар, Қостанай және Түркістан облыстарында да күрделі метеорологиялық жағдайлар болжануда.

Көптеген өңірлерде найзағай, бұршақ, шаңды дауыл, қатты жел, аптап ыстық күтіледі. Желдің екпіні жиі 15-20 м/с-қа дейін, ал кей жерлерде 25 м/с-қа дейін жетуі мүмкін. Бұған қоса, бірқатар облыстарда – әсіресе батыс, оңтүстік және шөлейт аймақтарда – төтенше өрт қаупі сақталады.

Мәселен, Маңғыстау, Қызылорда және Түркістан облыстарында шаңды дауыл мен аптап ыстық байқалып, ауа температурасы +40°C-қа дейін көтеріледі. Атырау, Ақтөбе, Павлодар мен Қостанай өңірлерінде де найзағай мен өрт қаупі қатар жүреді.

"Қазгидромет" мамандары ауа райының күрт өзгеруіне байланысты тұрғындарды абай болуға, далада ұзақ болмауға, қауіпсіздік ережелерін сақтауға шақырады.