Қазіргі таңда аллергиялық маусым басталды. Оның алдын қалай алуға болады? Оны емдеу мүмкін бе?

Осы және өзге де сұрақтарға Тамақтану эксперті, жалпы тәжірибедегі дәрігер, превентивті дәрігер Аида Мұхтарқызы жауап береді, — деп хабарлайды Caravan.kz медиа порталы.

— «Health Pro Academy» Халықаралық Дәрігерлер Ассоциацияңыз бар. Бұл ассоциацияның мақсаты қандай?

— Ассоциациямыздың басты мақсаты — дәрігерлерді біріктіріп, интегративті, профилактикалық және anti-age медицинаның ғылыми әрі тәжірибелік негіздерін дамыту. Біз тек ауруларды емдеумен емес, адамның денсаулығын сақтауға, өмір сапасын арттыруға, аурудың алдын алуға бағытталған көзқарасты насихаттаймыз. Сонымен қатар дәрігерлердің кәсіптік және медиалық дамуына қолдау көрсетеміз.

— «Анализ талдау» кітабыңыз құтты болсын. Кітап не туралы? Оны оқыған адам не алады?

— Рақмет! Бұл кітап — қарапайым адам үшін өте қажетті құрал. Біз көп жағдайда анализ нәтижесін алған соң не істеу керек екенін білмейміз.

“Анализ талдау” кітабы адамға өз ағзасын түсінуге көмектеседі:

• Қан анализін, зәр анализін оқуды үйренеді;

• Нәтижелер арқылы ағзада қандай өзгеріс болып жатқанын түсінеді;

• Қай кезде дәрігерге бару керек екенін алдын ала аңғарады.

Яғни бұл — денсаулығын бақылап үйренгісі келетін әр адам үшін нұсқаулық деуге болады.

— Қазіргі таңда дәрігердің медиа-дәрігер болуы қаншалықты маңызды?

— Өте маңызды. Себебі халықтың көпшілігі ақпаратты әлеуметтік желі арқылы алады. Егер білікті дәрігерлер медиаға шықпаса, онда ол орынды білімі жоқ “мамандар” басып алады.

Медиа арқылы дәрігер:

• Адамдарға нақты, ғылыми негізделген ақпарат береді;

• Өз мамандығын дамытады;

• Қоғамдағы медициналық сауаттылықты арттырады.

Бүгінде медиа – бұл емдеудің бір түрі. Сенімді ақпарат – аурудың алдын алудың ең күшті құралы.

— Сізге адамдар көп жағдайда қандай проблемамен келеді?

— Менің практикамда ең жиі кездесетін мәселелер:

• Шаршағыштық, энергияның азаюы (созылмалы шаршау синдромы);

• Ас қорыту проблемалары: іш кебу, қыжыл, дисбактериоз, гастрит , іш қату т.б.;

• Гормоналды бұзылыстар (қалқанша безі бөлетін гормондар бұызылысы,әйелдердің циклдік бұзылыстары, бала көтере алмау, тері проблемалары);

• Аллергия мен тері аурулары;

• Және, әрине, аурудың алдын алу үшін өмір салтын жақсартқысы келетіндер.

Көп жағдайда бұл мәселелердің түбі — дұрыс тамақтанбау, стресс және улану (токсиндер) болып шығады.

— Дұрыс тамақтану туралы: Адам неге мән беруі керек?

— Адам дұрыс тамақтану арқылы өз ағзасын сауықтырып, артық салмақтан арылуы мүмкін. Бірақ бұл тек калория санау емес.

Дұрыс тамақтануда алдымен мыналарға мән беру керек:

• Қарапайымдылық: неғұрлым таза, өңделмеген өнімдер;

• Режим: бір уақытта, асықпай тамақтану;

• Ішек микрофлорасына пайдалы өнімдер: талшық, ферменттелген тағамдар;

• Су ішу тәртібі;

• Және ең бастысы – тыңдау: ағзаңыз неге мұқтаж екенін түсіну.

— Маусымдық аллергия. Жолдасыңыз толық емделген дедіңіз. Қандай кеңес берер едіңіз?

— Иә, жолдасымда бұрын жаз сайын қайталанатын қатты аллергия болатын. Біз оны жүйелі түрде емдедік. Міне, бірнеше кеңес:

✅ Ішек тазалығы мен микрофлорасын қалпына келтіру — себебі иммунитеттің 70%-ы ішекте;

✅ Гистаминге бай тағамдардан уақытша бас тарту: сүт өнімдері, ұн өнімдері, қант, фруктыдан т.б.;

✅ Арнайы добавкалармен —қабынуды азайттық;

✅ Қарапайым токсиндерді шығару: бауыр мен лимфа жүйесіне поддержка жасадым ;

✅ Стрессті басқару — стресс те аллергияны күшейтеді.

Яғни, аллергия — тек мұрын немесе көздің реакциясы емес, бұл иммундық жүйенің ішкі күйінің айнасы.