Қазақстандық ММА жұлдызы Қуат «Найман» Хамитов ресейлік файтер Алексей Махноның ұсынысына байланысты пікір білдірді. Спортшы қарсы тарап ұсынған шарттарға көңілі толмайтынын ашық айтты, деп хабарлайды Skifnews.kz ақпарат порталы .

Хамитовтың сөзінше, Махно жіберген келісімшарттағы гонорар тым төмен және оның деңгейіне сай емес.

«Естуімше, Алексей Махно мені жекпе-жекке шақырыпты. Бірақ, Лёха, бұл кездесу өтпесін деп, сен бәрін істеп жатырсың. Келісімшарттағы сома – күлкілі. Ондай гонорарды мен он жыл бұрын алғанмын. Дұрыс ұсыныс жасасаңдар, дайынмын. Бір ай дайындалып, 5 желтоқсанда Мәскеуде рингке шығамын. Тек лайықты шарт пен ақшаны көрсетіңдер», – деді «Найман» Instagram парақшасында.

Айта кетейік, Қуат Хамитов өткен айда Ресейдегі ACA ұйымында дебют жасап, жергілікті спортшы Анатолий Бойконы төрешілер шешімімен жеңген болатын. Сол жекпе-жектен кейін ол жасы 35-тен асқан қарсыластармен ғана айқасуға дайын екенін жеткізіп, арнайы Махноға ашық шақыру жасаған еді.

Бұл жолы да Хамитов әділ келісім талап етіп, «дұрыс шарт болса, жекпе-жекке шығамын» деп отыр.

Жанкүйерлер енді Махно командасы ұсынысты қайта қарай ма, жоқ па – соны күтуде. Жекпе-жек болса, жылдың ең қызық айқастарының бірі болары сөзсіз.