Отандық ғалымдар балқытылған күкіртті құнды өнімге айналдырмақ . Осыған қажетті технологияны олар АҚШ-тың Аризона университетінің зерттеушілерімен бірлесіп әзірледі.

Ғылым және жоғары білім министрлігінің таратқан ақпа­ратына сүйенсек, еліміз күкірт өндіру бойынша әлемде 7-орында, жалпы өндіріс көлемі жылына шамамен 4,3 млн тоннаны құрайды. Сонымен қатар оның экспорты бар болғаны 200–400 млн доллар әкеледі. Бүгінгі таңда күкірт мұнай-газ өнеркәсібінің жанама өнімі ретінде негізінен елімізден шикізат түрінде экспортталады немесе аз мөлшердегі күкірт қышқылын алуға пайдаланылады. Бұл ретте оның шамадан тыс артық жинақталуы экологияға қауіп тудырады. Кен орындарындағы өндіріс көлемінің өсуін ескере отырып, шикізат экспортынан күкіртті инновациялық және құнды материалдарға өңдеу міндеті өзекті болып тұр.

Профессор Джеффри Пьюн бас­таған Аризона университеті (АҚШ) ғалымдарының жобасы осы мәселені шешуге көмектеседі. Олар балқытылған күкіртті полимерлерге, сондай-ақ ин­фрақызыл линзалар, литий-күкіртті аккумулятордың құрамдас бөліктері, коррозияға қарсы жабындар және баяу бөлінетін тыңайтқыштар сияқты басқа да жоғары құнды өнімдерге айналдыру үшін кері вулканизацияның озық технологиясын әзірледі.

Технология 50-ден аса ғылыми жарияланымдармен бірге 11 патентпен қорғалған және жоғары коммерция­лық әлеуетті көрсетеді. Мәселен, күкірт қышқылы қымбат емес, сусымалы химиялық зат. Жоғары көлемде сатылған кезде тоннасы – 100–200 доллар. Жоба құрамында күкірті бар бұдан да бағалы химиялық өнімдерді жасауға мүмкіндік береді. Мысалы, сыну көрсеткіші жоғары пластикалық линзалардың бір данасы 100–500 доллар тұрады.

Аталған жоба Қозыбаев универси­тетімен ынтымақтастықта жүзеге асырылып, бірлескен зерттеулер жүргізуді, зертханалар ашуды, кадрларды даяр­лауды және өндірісті іске қосуды көздейді. Студенттік және ғылыми алмасу бағдарламалары да жоспарланған: бұл жаңа озық материалдарды шы­ғаруға қабілетті ғылыми-өндірістік экожүйені қалыптастыруға негіз болады. Жоба биылғы сәуір айында Ғылым және жоғары білім министрі Саясат Нұрбек пен М.Қозыбаев атындағы СҚУ делега­циясының Аризона университетіне сапары барысында таныстырылды.

Жобаны сәтті іске асыру үшін кен орындарындағы күкіртке тікелей қол жеткізу және зертханаларға, жабдықтар мен тәжірибелік-өндіріс орындарына инвестиция салу қажет. Күкіртті сол жерде қайта өңдеуге, логистикалық шығындарды азайтуға, өнімді нарыққа шығаруды жеделдетуге және жаңа экспорттық бағыттарды қалыптастыруға жағдай жасайды. Осылайша, Қазақстан құрамында жоғары құнды күкірті бар материалдарды жасау бойынша әлемдік көшбасшылардың біріне айналуға мүмкіндік алады. Сондай-ақ жүзеге асыру күкіртті жинақтап, кәдеге жаратумен байланысты экологиялық мәселелерді шешуге де ықпал етеді.