Шара аясында Мәдениет және ақпарат министрлігі мен Ұлттық киноны қолдау орталығының қаржыландыруымен түсірілген отандық фильмдер көрсетіледі, деп хабарлайды 24kz.

Алғашқы болып қазақ тарихындағы тұңғыш кәсіпқой балуан Қажымұқан Мұңайтпасұлы туралы туынды көрермен назарына ұсынылды.

Күш атасына баланған Қажымұқан Мұңайтпасұлының өмір жолы бейнеленген туындыны тамашалауға келгендердің қарасы қалың. Көпшілік даңқты балуанның еңбекқорлығы мен қайтпас-қайсарлығына тәнті болды. Әке арманын орындау жолындағы күресі де ешкімді бей-жай қалдырмады.

Гүлжан Садықова, Қарабұлақ ауылының тұрғыны:

- Немеремді әдейі ертіп келдім. Қажымұқан атасының тарихын білсін. Ол кісінің жолын білсін. Қандай еңбекпен жеткенін ол кісінің көргенін көрсін деп. Енді Қажымұқан біздің қазақтың батыры.

Айжан Бектенбекова, қала тұрғыны:

- Рухани демалыс қой кино деген. Оның үстіне өзіміздің Қазақстаннң кинофильмінің түсірілімі ары қарай өркендей берсе екен дейміз. Қазіргі кезде көп коммерциялық фильм болып кетті ғой.

Фильмде Қажымұқан бабамыздың өмірі арқылы тұтас дәуір суреттеледі. Ұлт қасіреті ашаршылық пен соғыс жылдары да кеңінен көрініс тапқан. Тау тұлғаның жасөспірім шағын Диас Төлепберген сомдады. Ол даңқты балуанның рөлін ойнау үшін салмағын 120 келіге дейін жеткізіп, күрделі эпизодтарды каскадердің көмегінсіз орындаған.

Диас Төлепберген, актёр:

- Қажымұқан атамыздың рөлін сомдау өте қиын болды. Фильмде жылқы ауырып құлап, жылқыны көтеріп жатқызатын жері бар. Атамыздың қара күші бойымызда болмаса да, бірақ қолдан келгенше тырысып, каскадердің көмегінсіз жылқыны көтеруге тырыстым.

Тарихи туындының режиссёрі – Қанағат Мұстафин. Оқиғалардың шынайы шығуы үшін ол елімізде және Еуропада түсірілім жасаған. «Коронавирус індетінен көптеген қиындыққа тап болса да, өскелең ұрпақты ұлттық рухта тәрбиелейтін фильм шығаруға тырыстым», - дейді.

Қанағат Мұстафин, режиссёр:

- Қажымұқанды түсіре бастағанда аулада көретінмін, балалар ойнап жүреді. Мен робокоп, суперменмін деп. Сол кезде ойлағам, түсірілімді бастайын деп жатқанда «Мен Қажымұқанмын» деп ойнап жүрсе екен деп. Өзіміздің супергерой деп айтамыз ғой. Соны жасап шықсам ба деген арманым бар еді. Қазір сол арманың орындалып келе жатқан сияқты.

Фильмнің бюджеті 600 млн теңгеден асады. Оны еліміздің мәдениет және ақпарат министрлігі мен «Ұлттық киноны қолдау орталығы» қаржыландырған.

Нұржан Жалауқызы, «Ұлттық киноны қолдау мемлекеттік орталығы» жанындағы сарапшы кеңесінің мүшесі:

- 19 жылдан бері қарап көретін болсақ, 117-ден астам фильм көрермендерге жол тартты. Оның тек қана 72-сінің өзі көркем фильм. Одан кейінгісі деректі және анимациялық фильмдер. Сондай ақ фильмдердің басты тақырыптары – еліміздің тарихын әспеттеу, тарихи тұлғаларды таныстыру, ұлттық құндылықтарымызды қолдау. Көптеген анимациялық фильмдер бар.

Онкүндік аясында «Патриоттар уақыты», «Жамбыл – жаңа дәуір» сынды ұлттық рухты асқақтататын туындалар көпшілік назарына ұсынылады. Ал балаларға базарлық ретінде «Тайқазан» анимациялық фильмі көрсетіледі.

Авторлары: Шыңғыс Қалиден, Қуаныш Түргенбаев