Қытай мен Орталық Азия арасындағы ынтымақтастық артты.
Жыл басынан бері Қытай мен Орталық Азия елдері теміржолдағы жүк тасымалы арқылы сауда-экономикалық қатынастарды тереңдете түскен. Мұны Қытайдың «Си-си-ти-ви» телеарнасы хабарлап отыр. Оның дерегінше, біздің аймаққа Ганьсуден текстиль өнімдері, Сычуаннан тұрмыстық заттар, Чунциннен автобөлшектер экпорты артты. Ал Қытай тұтынушыларына Қазақстан мен Орталық Азияның жоғары сапалы ұн жеткізіліп жатыр.
Сарапшылардың пікірінше, Қытайдың орталығы мен Шыңжаң тәрізді батысы Еуразия континентімен байланыста маңызды рөл ойнап отыр. Сонымен қатар, кейінгі кездері Қытай-Орталық Азия және Қытай-Еуропа транскаспийлік пойыздар қатынасы өзара тиімді сауда-экономикалық байланыстарға негіз болып отыр. Бұған қоса, кедендік рәсімдеу жеңілдеп, Қытайдан Орталық Азияға жеткізілетін тауарлар түрі көбейіп келеді.
Ван Хунлян, Ланьчжоудың Цзиньчэн кеден қызметінің басшысы:
Тасымалданатын тауарлар түрі әр алуан. Минералдық өнімдер мен жеміс-жидектен бастап, автобөлшектер мен аса қажетті заттарға дейін саудаланады. Сонымен қатар, біз бақылау моделін өзгерттік. Мысалы, порттардағы кедендік рәсімдеу уақыты 30 пайызға дейін қысқарды.
Қытай мен Қазақстан достығына экономикалық байланыстар ғана емес, жеке адамдар да үлес қосып жатыр. Солардың бірі – Қытайда 200 мыңнан астам адамның көзін емдеп, жанарын қалпына келтірген қазақ хирург-офтальмологы Сәулебек Қабылбеков. Дацин қаласының жұртшылығы оны «доктор Бек», және Қытай-Қазақстан достығының хабаршысы деп атайды. 2024 жылы «доктор Бек» беделді Қытай достық сыйлығын алды. Бұл -әркімге берілмейтін, аса абыройлы шетелдік сарапшыларға көрсетілетін құрмет. «Доктор Бек» жақында Екінші Қытай-Орталық Азия саммиті қарсаңында Қытай орталық телеарнасына сұқбат берді.
Сәулебек Қабылбеков, Дацин көз ауруханасының хирургі:
Мен 1993 жылы Қытайға келгенімде мұнда офтальмология әлі дамып жатқан еді. Біз көмектесу үшін қалдық. Қазір Қытай өркендеп, өз дәрігерлерін Азия мен Африканың басқа бөліктеріне жіберіп жатыр. Алғашында Дацин қаласында осыншама ұзақ тұрамын деп ойламаппын. Бірақ уақыт өте келе Қытайда жұмыс істеп, өмір сүруге бейімделдім.
Арыстан Рысбек
