Шомылу маусымы басталғалы бері Елордада судағы қауіпсіздік шаралары күшейтілген, деп хабарлайды 24KZ. «Қауіпсіз қала» акциясы аясында Төтенше жағдайлар департаментінің мамандары қала тұрғындарына түсіндіру жұмыстарын жүргізеді. Олар демалушыларға қауіпсіздік талаптарын сақтаудың маңыздылығын айтып, бүлдіршіндерді қараусыз қалдырмау қажеттігін ескертіп жүр. Шараға «AMANAT» партиясы жанындағы «Жастар рухы» жастар қанатының белсенділері де атсалысып жатыр.

9 маусымнан бастап Төтенше жағдайлар департаменті мен жергілікті билік өкілдері елордадағы рұқсат етілген және тыйым салынған су айдындарының маңын барлап, шомылушыларға түсіндірме жұмыстарын жүргізіп келеді. Жағажай маңына топтасқан қала тұрғындары мен қонақтарына қауіпсіздік талаптарын сақтаудың маңызын айтып, бүлдіршіндірдерді қараусыз қалдырмау қажеттігін жеткізіп жатыр.

Мәди Мағауиянов, Астана қаласы ТЖД аға офицері:

- Балаларды қараусыз қалдырып кетеді, балалар батып кетеді және де ішімдік ішіп суға түседі. Ережелерді сақтаса дейміз. Шомылу маусымы 1 маусымнан басталды. Қазіргі уақытта күнделікті рейд өткізіп жатырмыз.

Бүгінде бас қала аумағында шомылуға рұқсат етілген 5 ресми орын бар. Ол: Орталық жағажай, Көктал-1 шағынауданындағы «Три пескаря», «Армина», «Столичный двор» және Бейсеков көшесі көпірінің маңындағы коммуналдық жағажай. Мәслихат шешімімен суға түсуге тыйым салынған учаскелер де белгіленген.

Арсланбек Мағзұм, Астана қаласы мәслихатының депутаты:

- Бұл акция «AMANAT» партиясының және «Жастар рухы» жастар қанатының бастамасымен бүкіл республика бойынша өткізіліп жатыр. Азаматтарға қай жерде шомылуға болатынын және қай жерде болмайтынын түсіндіру үшін қоғамдық пікір көшбасшыларын, блогерлерді де осы жобаға тарттық. Барлығы жүйелі түрде жүргізіледі.

Суда жүзу маусымы басталғалы бері Астанада тыйым салынған орындарда шомылғаны үшін 11 адамға әкімшілік айыппұл салынған. Қауіпсіздік талаптары өзге емес, өзіміз үшін қажет. Сақтық шараларына салғырттық танытпайық.

Авторы: Назым Қайрат