Сот ұйғарымы заңды күшіне енді.

Түркістан қаласында білім беру ұйымының бірінде мұғалім "әдепке қайшы іс-әрекет жасағаны үшін" жұмыстан босатылған. Бұған Алматы әуежайында болған оқиға себеп болған. Әйел адам қызметінен шығарған білім беру ұйымын сотқа берген, деп хабарлайды inbusiness.kz сайты

Белгілі болғандай, әуежайдың қауіпсіздік қызметі жүргізген тексеріс кезінде мұғалімнің аңдамай сөйлегенін қоғамға қауіп ретінде қабылдаған.

"Осыған байланысты мұғалімге қатысты Қылмыстық кодекстің 273-бабы (Терроризм актісі туралы көрінеу жалған хабарлау) бойынша қылмыстық іс қозғалған. Алайда кейіннен желілік полиция бөлімі қылмыстың құрамның болмауына байланысты істі тоқтатқан. Сотта талапкер Е. өзінің жұмыстан босатылуын заңсыз деп тануды, себебі тәртіптік комиссия жұмыстан босату мәселесін қарау барысында бейтараптық танытпағанын, түсініктемелерінің ескерілмегенін, еңбек шартын бұзу туралы шешім қылмыстық іс ресми түрде тоқтатылғанға дейін қабылданғаны Еңбек кодексінің нормаларына қайшы екенін атап көрсетті", – деп хабарлады облыстық сот.

Мұғалім еңбек шартын бұзу туралы бұйрықты заңсыз деп тануды, жұмыстан босатудың негізін "тараптардың келісімі бойынша" деп өзгертіп, еңбек кітапшасына тиісті түзету енгізуді және моральдық зиянның орнын толтыруды сұраған.

Тараптар арасында татуласу келісімі жасалып, ол сотпен бекітілді.

Келісімнің шарттарына сәйкес, білім беру ұйымы еңбек шартын бұзу туралы бұйрыққа, enbek.kz онлайн платформасындағы және мұғалімнің еңбек кітапшасындағы жазбаларға тиісті өзгерістер енгізуге міндеттелді.

Сот ұйғарымы заңды күшіне енді.