Киіктер арасында генетикалық , тұқым қуалайтын жаңа аурулар көбейген.

Қазіргі таңда Қазақстанның батысындағы киіктердің саны 4 миллионнан асқан. Олардың табиғи өлімі 16-25 пайыз аралығын құрайды. Сәйкесінше, қыс өтіп, қар еріген шақта 800 мың бас киік өлексесін жинау міндеті туындайды. Бұл туралы Мәжілістің Аграрлық мәселелер комитетінің отырысында Жәңгір хан атындағы Батыс Қазақстан аграрлық-техникалық университетінің ғылым жөніндегі проректоры, биология ғылымдарының докторы Әлжан Шәмшидин айтты.

Оның сөзінше, бұл өлекселер қандай аурулардың ошағына айналатынын ешкім де болжап айта алмайды. Өйткені, қазір киіктер шаруалардың малымен бірге жайылса, өлекселері малға арналған қорымдарға тасталып жатыр.

"Біздің зерттеуіміз бойынша, мониезиоз паразитінің қоздырғышы жабайы киіктердің 63 пайызында, эхинококкоз 17 пайызында, ценуроз 18 пайызында, нематодоз 64 пайызында кездеседі. Бұл мәселені қазір реттемесек кейін бой бермей кетеді", – деді Әлжан Шәмшидин.

Оқи отырыңыз: Қазақстан киік экспортының нөлдік квотасын жою бойынша CITES хатшылығына өтінім жолдады

Ғалымның сөзінше, Қазақстанда киіктердің үш поуляциясы бар, бірақ олар бір-бірімен араласпайды. Сәйкесінше, туыстығы жақын киіктердің бір-бірімен шағылысуы олардың генетикасының бұзылуына және киіктер арасында тұқым қуалайтын ауралардың көбеюіне әкеліп жатыр.

"Туыс киіктер бір-бірімен шағылысқанда, оларда мутациялық аурулар пайда болып, гені әлсірейді, иммунитеті төмендейді. Оған қоса, жұқпалы, генетикалық және тұқым қуалайтын аурулар туындап, көбейіп жатыр", – деді ғалым.

Оқи отырыңыз:

• "Құралайдың салқыны": Қазақстанда киіктер төлдей бастады
• Президент киік санының күрт артуына қатысты байыпты шешім қабылдауды тапсырды