Әлем бойынша алдағы 25 жылда энергияға сұраныс 23 пайызға артады.

Бұл баламалы қуат көздерінің даму қарқынына қарамастан, мұнайға деген жаһандық сұраныстың көбеюіне алып келеді. Бұл туралы Мұнай экспорттаушы елдер ұйымының жаңа баяндамасында айтылды. Ал Еуропа қазір жасыл энергия саласына басымдық беріп отыр. Күн панельдерінің арқасында электр қуатының бағасы айтарлықтай арзандап келеді.

Жаңартылатын энергия көздерінің тиімділігіне қарамастан, бұл таңдаудың бірқатар күрделі технологиялық мәселелері бар.

2050 жылға қарай мұнайға күн сайынғы сұраныс 123 миллион баррельге жетпек. Бұл шамамен 20 миллиард литр. Қазіргімен салыстырғанда 23%-ға көп. Оның артуына халық санының өсуі себеп болмақ. ОПЕК сарапшылардың болжамына сенсек, алдағы 25 жылда жер бетіндегі адам саны 1,5 миллиардқа көбейеді. Дегенмен, мұнайға сұраныс артқан сайын, жалпы энергия өндірісіндегі үлесі азаюы мүмкін. Мәселен, қазірде жалпы энергия өндірісінің 80 пайызы қазба отындардың үлесінде. Бұл көрсеткіш 2050 жылы 50 пайызға азаяды деген болджам бар.

Хайсам Аль-Гайс, ОПЕК бас хатшысы:

- Былтыр мұнай, газ және көмірдің жалпы энергия бойынша үлесі шамамен 80% болды. Бұл 1960 жылы ОПЕК құрылған кездегі көрсеткішке ұқсайды. Содан бері тұтыну 5 есе артты. Қазір әлем барлық энергия көздерін пайдаланады және олар бірін-бірі толықтырып отырады.

Сарапшылардың пікірінше, Жасыл энергетиканы дамыту жылдан-жылға қарқын алғанымен, қазба отын жаңартылатын энергияны ұзақ уақыт бойы «сақтандырушы» сектор ретінде қалмақ. Дегенмен мұнай, газ және көмірдің қоры таусылады. Осы себепті халықаралық ұйымдар болашағы бар бағыттарды дамытып, оларға инвестицияны көбірек салуға шақырады.

Еуропада күн энергиясы басты қуат көзіне айналды

Биыл Еуропада күн энергиясы алғаш рет басты қуат көзіне айналды. Статистикаға сәйкес, өткен айда ЕуроОдақта өндірілген электр энергиясының 22,1%-ы осы ресурстың үлесіне тиесілі болды. Бұл былтырғы жылдың осы кезеңімен салыстырғанда 18,9% жоғары. Мұндай өсімге күн панельдерін орнатудың көбеюі себеп. Бір маусым айында 45,4 тераватт-сағат электр қуаты өндірілген. Ал атом электр станцияларының үлесі – 21,8% болса, жел энергетикасы 15,8%-ды құраған. Ember талдау орталығының мәліметіне сүйенсек, Еуроодаққа мүше 13 елде, оның ішінде Германия, Испания және Нидерландта күн көзінен энергия өндіру көлемі біршама өскен.

Даниэль Кухенбекер, Берлиндегі күн энергиясы орталығының кеңесшісі:

- Қазір күн панельдеріне сұраныс өте жоғары. Біз азаматтарға осы жаңғыртылатын қуат көзіне көшуге кеңес береміз. Бір жағынан бұл экономикалық тұррғыдан өте тиімді. Коммуналдық төлемдер азаяды. Екіншіден қоршаған ортаны қорғауға көмектеседі. Үкімет те халықты ынталандырып, үйлеріне күн панельдерін орнатқандарға 250 еуро сыйақы береді.

Баламалы энергия көздерінің үлесі артады

Келер жыл ұзақ мерзімді энергетикалық өтпелі процестің бір бөлігі ретінде қарастырылып отыр. Яғни, қазба отындарына тәуелділікті азайту мен жасыл энергияны көбейтуге көбірек мән беріледі. Халықаралық энергетика агенттігі осылай деп болжап отыр. Жаңартылатын энергия көздерінің жаһандық қуаты 11%-ға артуы мүмкін. Ал мұнайға деген сұраныс өсімі бар-жоғы 0,7%-ға тең болады. Бұл 2009 жылдан бергі ең төмен көрсеткіш. Энергия тұтыну технология мен электромобиль салаларының дамуымен байланысты болады. Ал деректер орталықтары, криптовалюта мен жасанды интеллектке әлемде өндірілетін электр қуатының 4%-ы жұмсалуы мүмкін.