Samruk-Kazyna Construction АҚ басқарушы директоры мен "Дорстройтрест" ЖШС басшысына қатысты тергеп-тексеру аяқталды, — деп хабарлайды Massaget.kz тілшісі.
Олар "Көк-Төбе" көппәтерлі тұрғын үй кешенінің құрылысына бөлінген бюджет қаражатын жымқырды деген күдікке ілінді. 2022 жылғы қаңтарда Samruk-Kazyna Construction АҚ мен "Дорстройтрест" ЖШС арасында құрылысқа инвестиция салу туралы келісімшарт жасалып, 2,6 млрд теңге көлемінде аванс төленген.
Алайда құрылыс жұмыстары белгіленген мерзімде аяқталмаған және өрескел заңбұзушылықтар жасалған. Ал авансты күдіктілер құрылысқа қатысы жоқ қарыздарды өтеуге және көлік сатып алуға жұмсаған.
Сонымен қатар, 650 млн теңге көлеміндегі жалған шарттар арқылы компаниялардың шоттарына аударылып, қолма-қол ақшаға айналдырылған.
ҚМА мәліметінше, күдіктілер заңсыз ақшаға 23 млн теңге тұратын екі көлік сатып алып, оларды жасыру мақсатында сенімді адамдардың атына рәсімдеген.
"Сот санкциясымен күдіктілердің 170 млн теңге тұратын барлық мүлкіне, яғни 5 көлік пен Астанадағы пәтерге тыйым салынды. Күдіктілерге қамауда ұстау түріндегі бұлтартпау шарасы таңдалды. Samruk-Kazyna Construction АҚ-ның бұрынғы басқарушы директорына халықаралық іздеу жарияланды", — деп жазылған хабарламада.
Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!
