Семейде 350 азаматты алдаған қаржы пирамидасы әшкереленді. Бұл туралы Қаржылық мониторинг агенттігі хабарлады.

«Rakhat0425» қаржы пирамидасын облыстық департамент анықтап, қызметін тоқтатты. Ұйымдастырушылар азаматтардан мемлекеттік сатып алуға қатысы бар жалған инвестициялық жобаға қаржы тартып, 30% дивиденд уәде еткен. Нәтижесінде 350 адам 790 миллион теңгеден астам қаражатынан айырылды.

Ернар Тайжан, ҚМА ресми өкілі:

- Сонымен қатар күдіктілер азаматтарды пәтерлерін төмен бағамен беруге көндіріп, кейін оларды үшінші тұлғалардың атына рәсімдеген. Бұл мүлік «инвестициялық жарна» ретінде бағаланған. Қазіргі уақытта екі күдікті қамауға алынып, үшіншісіне үйқамақ түріндегі бұлтартпау шарасы қолданылды.