Ұлытау облысында 2028 жылға дейін жалпы құны 920 млрд теңге болатын 25 ірі жоба жүзеге асырылады.
Нәтижесінде 2 мыңнан астам жаңа жұмыс орны ашылады. Бұл туралы облыс әкімінің Жезқазған қаласы тұрғындарымен кездесуінде айтылды. Аймақ басшысы өңір экономикасын әртараптандыруға бағытталған инвестициялық жобаларды таныстырып, атқарылған жұмыстардың ретін баяндады.
Биыл Ұлытау облысы экономикасына 207 млрд теңге инвестиция тартылды. Оның 30 пайыздан астамы облыс орталығы Жезқазғанға тиесілі. Бұдан бөлек соңғы үш жылда қала қазынасы екі есеге өсті. Бұл қаржы қаланың инфрақұрылымын жаңғыртуға бағытталды. Алдағы уақытта өндіріске тәуелді қалада экономиканы әртараптандыруға басымдық беріледі деді аймақ басшысы.
Дастан Рыспеков, облыс әкімі:
- Жезқазған қаласы бойынша 5 мың бастан асатын қой шаруашылығы фермасы, 10 мың тоннаға дейін көкөніс сақтау қоймасы және 500 гектар аумақта мал азығын егу жобалары. Қазіргі таңда облыс әлеуметтік азық-түлік тауарларының 4 түрі бойынша, ал келесі жылы тағы 2 тауар түрі бойынша ішінара өзін өзі қамтамасыз етеді.
Аймақта ширек ғасырға жуық тұралап қалған тұрғын үй құрылысы біртіндеп қарқын алып келеді. Өткен жылы 500 отбасы баспаналы болса, биыл тағы 300-і қоныс тойын тойлайды. Ал, әлеуметтік салада атқарылған жұмыс көп. Ұлытау жеке облыс болғалы денсаулық сақтау саласы мен төтенше жағдайлар департаментінің материалдық қамту көрсеткіші 90 пайызға жуықтады. Жол сапасын жақсарту бағытында тек биылдың өзінде 260 шақырым жол жөнделді.
Дастан Рыспеков, облыс әкімі:
- Қызылорда-Жезқазған жолын реконструкциялау аясында құрылыс жұмыстары басталып, 4/1 бөлігіне асфальт жамылғысы төселді. Республикалық маңызы бар Қаражал-Атасу жолының реконструкциясына 1,7 млрд теңге бөлінді жоба жалғасуда.
Биыл облыс көлемінде 50 шақырымға жуық жылу құбыры мен 800 километр электр желісі жаңартылды. Әкім инженерлік инфрақұрылымды жаңғырту жұмыстары алдағы уақытта да жүйелі түрде жалғасатынын атап өтті. Кездесу барысында тұрғындар тарапынан көтерілген сауалдарға жауап берді.
Елдос Кәкенов, Нұрлан Исмаилов
