Қарағанды облысында қайтарылған активтер есебінен онкологиялық аурухананың операциялық-жансақтау бөлімі жабдықталып жатыр.

Бұл мақсатқа 6 млрд 200 млн теңге бөлінді. Ал, Балқаштағы көпбейінді аурухананың базасында ауданаралық медициналық хаб құрылды. Оның материалдық-техникалық жабдығына 1 млрд теңге жұмсалды. Аурухана шалғай елді мекендердің тұрғындары мен «Алматы-Екатеринбург» тасжолы арқылы өтетін жолаушыларға қызмет көрсетеді. Жоба аясында қосымша корпус та салынып жатыр. Онда жол апатынан зардап шеккендерге жедел медициналық көмек берілмек.

Серікбол Түсіпбеков, Балқаш қалалық көп бейінді аурухананың бас дәрігері:

- Қазір жаңадан шұғыл операция жасайтын бөлме жасап жатырмыз. Қосымша ғимаратта болады. Сонымен қатар атап өту керек, біздің қала енді өндіріс қаласы болғаннан кейін өндіріс апаттарынан да бізге әкеліп тұрады. Өйткені біздің айналамызда шахталар да, рудниктер де бар, үлкен өнеркәсіп те бар.