Елордадағы №92 мектеп-лицейінің оқушылары қоқысты сұрыптауды үйреніп жүр.
Олар қағаз, пластик пен металды бөлек жинап, қоршаған ортаның ластануын болдырмауға үлестерін қосуда. "Адал азамат- біртұтас тәрбие" бағдарламасы аясында ата-аналармен де бірлескен іс шаралар ұйымдастырылды.
Экологиялық апталық аясында балалар қағаз, пластик, басқа да тұрмыстық қалдықтарды сұрыптауды үйренеді. Әуелі әр заттың табиғатқа тигізер залалы жайлы мәліметтермен танысады. №92 лицейдің оқушылары бұл қағидатты күнделікті өмірде де ұстанады. Мұны кіреберістегі қоқыс жәшіктерінен-ақ аңғаруға болады.
Сәлима Тәжібай, №92 мектеп-лицейдің 10-сынып оқушысы:
- Экология бағытында біз өте үлкен үлес қосамыз деп ойлаймын. Енді әрине біз Қазақстанда өмір сүргендіктен өзіміз таза жерде өмір сұргіміз келеді. Сол үшін мен адамдарға көмектескім келеді, табиғатқа көмектескім келеді.
Мектеп әкімшілігі мұғалім-бала-ата-ана принципімен жұмыс істейді. Соның аясында бірлескен іс-шаралар ұйымдастырады. Мәселен, жақында қоқысты сұрыптауға арналған экологиялық акция өтті. Ата-аналар балаларымен бірге тұрмыстық қалдықтарды дұрыс бөлуді үйреніп, интеллелектуалды сайысқа қатысты.
Оразгүл Жолдасбекова, №92 мектеп-лицейдің директоры:
- "Таза Қазақстан" жобасы аясында 5-6, 9-10, 11-сыныптар арасында экологиялық мәдениетті қалыптастыру аптасы жүріп жатыр. Бұл іс-шараға оқушыларымыз қызығушылық танытып отыр. Өткен аптада ата-аналармен жиналыс болды. Ата-аналардың алдында да оқушыларды осы экологиялық мәдениетті қалыптастыруға шақыру жұмысы жүргізілді.
Айгүл Қасымбекова, №92 мектеп-лицейдің биология пәнінің мұғалімі:
- Бұнда біз қалдықты сұрыптаудың жолдары. Мысалы, пластиктардың әртүрлі түрлері бар. Соларды қалай өңдейді екен? Өңдеуге жарай ма екен? Екінші пайдалануға бола ма, болмай ма? Сондай мағлұматтар бердік. Енді мақсатымыз оқушыларға әрі қарай осы білімдерн көбейтіп, ұлғайтып өз үлестерін экологияға енгізу.
Оқушылар Астанадағы қоқыс полигондарын жойып, қатты тұрмыстық қалдықтарды белсенді сұрыптау мен өңдеуге үлес қосуды мақсат етеді. Қазақстандықтардың экологиялық таза ортада өмір сүргенін қалайды.
Ғазиза Мұхамеджанова, Абдулхамит Бөлекбаев
