Ел азаматтары бір жыл ішінде QR-дың көмегімен 23 млн-нан астам құжатқа қол қойған. Бұл туралы Жасанды интеллект және цифрлық даму министрлігі хабарлады.

Елде халық игілігі үшін түрлі цифрлық шешім қабылданып жатыр. Мәселен, қазір әскери билеттің электрондық нұсқасы бар. Сонымен қатар ата-аналар сәбиін балабақшаға ваучерлік қаржыландыру арқылы онлайн орналастыра алады. Ұсақ жол-көлік оқиғасы бола қалған жағдайда полиция шақырмай-ақ түйткілді реттеуге арналған «Еурохаттама» қосымшасы былтыр іске қосылды. Бұл жүйе жол жүктемесін азайтып, сақтандыру өтемақысын төлеу мерзімін біршама қысқартады. Ал мемлекеттік автоматтандырылған ақпараттық жүйе шетелге шығуды шектеу немесе мүлікке тыйым салудың бар-жоғы туралы ақпарат береді.