Сәуір айында жолға шыққан «Саламатты Қазақстан» медициналық-құқықтық пойызы 100 мыңға жуық ауыл тұрғынына кәсіби көмек көрсетті. Алматыда шалғай өңірлердің халқы асыға күтетін жобаның алты айдағы жұмысы қорытындаланды. Пойыз алыс аймақтағы 123 ауылды аралап шықты. Дәрігерлердің кешенді тексерулері нәтижесінде 2 мыңнан астам ауыр созылмалы ауру ерте сатысында анықталды. Оның ішінде онкологиялық дерттер, қант диабеті, глаукома, тромбоз, жүрек-қан тамырлары жүйесі аурулары бар.

Сонымен қатар заңгерлік көмекке жүгінген ауыл тұрғындары да көп. Мамандар интернет-алаяқтардан зардап шеккен азаматтардың істерін сотқа жолдау, әлеуметтік төлемдерді рәсімдеу, апатты үйлерді ауыстыру, банктер мен микроқаржы ұйымдары алдындағы қарыздарды оңтайландыру бойынша көмек көрсетті. «Саламатты Қазақстан» жобасы 13 жылдан бері жүзеге асып келеді.

Альфия Адиева, ҚР Президенті жанындағы Әйелдер істері және отбасылық демография жөніндегі ұлттық комиссияның мүшесі:

- Заңгерлер тек қана оларға кеңес беріп қана қоймай, тиісті құқық органдарына арыз шағымдарды жазуға көмектеседі. Олар келесі ауылдарға, басқа өңірлерге кетсе де жоба аяғына дейін сол арыз-шағыммен келген азаматтармен байланыста болып, олардың арыз-шағымдарын толыққанды сот құқық органдарында қаралып, шешімін табу мәселелерімен айналысып отырады. Яғни бір күндік қана жұмыс емес.