Тәуелсіздіктің төл құрдастары бүгінде ұрпақ тәрбиесімен айналысып жүр.

Олардың арасында тәжірибелі маман атанғаны көп.

Мұғалім мамандағын таңдағандары білім саласын дамытуға үлес қосып, оқушыларға сапалы білім беруде.

Еліміз тәуелсіздік алған жылы дүние есігін ашқан Ғалымжан Ізімов биыл облыстағы «Үздік арнайы пән оқытушысы» атанды. Білікті маман өзі білім алған колледжде болашақ энергетиктерді оқытады. Өндірістегі адам күшін жасанды интеллект пен робот алмастыра бастаған кезеңде бәсекеге қабілетті шәкірт тәрбиелеу әр ұстаздың парызы, дейді ол. Ол үшін теория мен өндірістік тәжірибені қатар үйрету маңызды.

Ғалымжан Ізімов, Ақтөбе жоғары политехникалық колледжінің арнайы пәндер оқытушысы:

- Заман жетілген сайын біздің электрэнергетикадағы жабдықтарымыз күннен күнге жетіліп келеді. Қазір цифрлық технологиялар шығып жатыр. Осы жабдықтардың барлығын біз колледжге жабдықтап нақты өндіріс деңгейіне жеткізуге тырысып жатырмыз. Қазақстанның дамуы тікелей осы заманауи технологияларының дамуымен және білікті мамандармен тікелей байланысты. Өйткені ел Президентіміздің өзі жұмысшы мамандар экономикамыздың дамуының басты драйвері деп айтқан болатын.

Қаныш Сәтпаев атындағы мектеп-лицейін басқарып отырған Талғат Әбен де колледж түлегі. Компьютер бағдарламалаушысы мамандығын үздік дипломмен тәмәмдағаннан кейін институтқа құжат тапсырған. Қоғамның болашағын қалыптастыратын маңызды міндет – шәкірт тәрбиелеуге үлес қосуды мақсат тұтады. Бұл арманы орындалып орта мектепте және колледжде сабақ береді.

Талғат Әбен, Қ. Сәтбаев атындағы орта мектеп-лицейінің директоры:

- Қандай жетістік болмасын ол оқу арқылы, іздену арқылы келетінін ұққан жастардың дәуірі деп ойлаймын қазіргі таңда. Сол себептен балалардың болашағы білім мен тәрбиені ұштастыра білетін жастарымыздың қолында. Ата-бабамыздан қалған салт дәстүрлерді заманауи технологиялармен ұштастыра біліп мен олаймын біз ең мықты, адал азамат тәрбиелеп шығарамыз деп.

Қатаң іріктеуден өтіп мектеп басшысы атанғанымен педагог-зерттеуші дәріс оқудан қол үзбеген. Жоғары сынып оқушыларына сабақ береді. Балалықпен қош айтысып, саналы шаққа қадам басқалы жүрген жеткіншектерге пән бағдарламасынан бөлек кәсіптік бағыт-бағдар беріп отырады.

Жаннұр Разақова, Қ. Сәтбаев атындағы орта мектеп-лицейінің оқушысы:

- Мен болашақта медицина мамандығын таңдап отырмын. Бұрын осы информатика пәні медицинаға ешқандай қатысы жоқ, керегі жоқ деп ойлағанмын. Бірақ осы информатика сабағын тереңірек оқи келе информатика пәнінің болашағы жайлы өте көп ақпарат білдім.

Тәуелсіздіктің төл құрдастары бүгінде сан саланы меңгеріп, білікті маман болды. Оның ішінде өскелең ұрпақтың білімді әрі саналы болуына үлес қосатын ұстаздар көп.

Мансұр Есқожин, Айнадин Молдабеков, Айбек Даутов