Форум Қазақстандағы заманауи конституциялық-құқықтық ойдың негізін қалаушылардың бірі, профессор А.Т. Ащеуловтың 100 жылдығына арналды.

Қор көп жыл бойы білім, ғылым және құқық саласындағы жобаларды қолдап келеді. Бұл миссия конференция аясында да айқын көрінді. Қордың атқарушы директорының орынбасары Игорь Рогов құттықтау сөзінде адам қадір-қасиеті – адам құқықтарының негізі екенін, ал лайықты өмірді қамтамасыз ету үшін мемлекет пен сарапшылар қауымдастығының жүйелі еңбегі қажет екенін атап өтті.

Сонымен қатар, Қор жастарды қолдаудың тұрақты экожүйесін қалыптастырып отырғаны ерекше айтылды. Бұл гранттар мен стипендиялардан бастап зерттеу байқаулар мен халықаралық бағдарламаларға дейінгі құралдарды қамтиды. Осы құралдар студенттер мен жас ғалымдарға әлеуетін ашуға және жаңа деңгейдегі құқықтық мәдениетті қалыптастыруға мүмкіндік беріп отыр.

Қор жанындағы Ғылым кеңесінің төрағасы Ермек Тоқтаровтың айтуынша, мұндай конференцияларды қолдау елдегі ғылыми диалогты кеңейту мен жастар зерттеулерін ынталандыруға бағытталған ұзақ мерзімді стратегияның бір бөлігі.

Конференция барысында ғалымдар мен практиктер адамға лайықты өмір сүру құқығына конституциялық кепілдіктер, әлеуметтік саясат, мәдени құқықтар, цифрландырудың сын-қатерлері, өзін-өзі анықтау және этносаралық келісім мәселесі, сондай-ақ Конституциялық Соттағы әлеуметтік құқықты қорғау тәжірибесін талқылады. Профессор Ащеуловқа арналған тарихи-биографиялық материалдар да қатысушылардың ерекше қызығушылығын тудырды.

Студенттер үшін «Ақыл-ой ойындары» атты психологиялық ойын өткізілді, ал үздік студенттік мақалалар Қордың жүлделерімен марапатталады, бұл болашақ зерттеушілер үшін маңызды қолдау болмақ.

Конференция ғалымдар, мемлекеттік институттар мен жастар арасындағы диалогтың маңызды алаңына айналып, адамның лайықты өмір сүру құқығын қамтамасыз ету жолында қоғам мен мемлекеттің серіктестігі қажет екенін тағы бір мәрте еске салды. Қор көрсеткен қолдау іс-шараның стратегиялық маңызын арттырып, оның Қазақстандағы ғылым мен жастар әлеуетін дамытуға қосқан үлесін айқындай түсті.