Қазақстан Біріккен Ұлттар Ұйымындағы Халықаралық еріктілер жылын бастап берді. Ауқымды бағдарлама Президент Қасым-Жомарт Тоқаевтың ұсынысымен қолға алынған.
Игі бастама волонтёрлердің тұрақты дамуға қосатын үлесін мойындап, оны күшейте түсуге бағыттайды. Нью-Йоркте өткен іс-шараның тұсаукесер рәсіміне Мемлекет басшысы бейнеүндеу жолдап, аумалы-төкпелі заманда ерікті болу «қуатты жасампаз күшке» айналғанын атап өтті. Президент еріктінің қоғамдағы ынтымақты нығайтудағы маңызды рөліне тоқталып, «Таза Қазақстан» акциясын мысалға келтірді. Салтанатты жиынға Бас ассамблея президенті Анналена Бэрбок пен Бас хатшы Антониу Гутерриш те қатысты. Еліміздің атынан Премьер-министрдің орынбасары, Жасанды интеллект және цифрлық даму министрі Жаслан Мәдиев сөз сөйледі.
Жаслан Мәдиев, ҚР Премьер-Министрінің орынбасары, Жасанды интеллект және цифрлық даму министрі:
- Бүгін Біріккен Ұлттар Ұйымы штаб-пәтерінде 2026 жыл – орнықты даму мақсаттарына орай Халықаралық еріктілер жылы деп ресми жарияладық. Президент Қасым-Жомарт Тоқаев көтерген бастама әлемнің барлық елінің қолдауына ие болды. Алда ерікті болу үрдісі азаматтарымыздың жүрегінде жалғасын тауып, жаңа игі істерге жол ашады деп сенеміз.
Тойлы Құрбанов, БҰҰ еріктілері атқарушы үйлестірушісі:
- Қай заманда болса да еріктілер қызметі қоғамның маңызды күші болып келеді. Ресми һәм бейресми түрде, ел ішінде де, халықаралық деңгейде де еріктілер — көмекке мұқтаж жандарға қол ұшын соза алған жандар. Алайда олардың еңбегін елеп-ескеруді ұмытып кетіп жатамыз. Сол себепті келесі жылды әлемдік деңгейде еріктілер қызметіне арнағалы отырмыз.
