Шымкентте ширек ғасырдан астам халыққа қызмет көрсеткен аттракциондар паркі «Қиял әлемі» саябағы қызметің біржолата тоқтатты, деп жазады Egemen.kz ақпарат агенттігі.

Шаһардың дәл орталығындағы парк сүріліп жатыр. Оған себеп кезінде жекешелендіру дұрыс өтпей, саябақ жер телімін кәсіпкерлер заңсыз иемденген. Сәйкесінше заңсыз халыққа қызмет көрсеткен. Қала әкімі Ғабит Сыздықбековтің бастамасымен осы заңсыз әрекетті тоқтатып, парктің жер телімін мемлекет меншігіне қайтару үшін әкімдік сотқа талап арыз берді.

Сөйтіп Шымкент қаласының мамандандырылған ауданаралық экономикалық сотының шешімімен арыз иесі Шымкент қаласының жер ресурстарын басқару департаментінің арызы қанағаттандырылып, «Қиял әлемі» саябағын бұзу туралы сот шешімі заңды күшіне енді.

О баста республика даңғылының бойында орналасқан саябақ жасыл желекпен көмкерілген әдемі парк болған екен. Бірақ кейін бұл аумақты жалға алған жаңа қожайындар парктің ішіне әртүрлі аттракциондар орнатып тастаған. Сот орындаушылар 9 аттракцион иесіне нысандарын өз қаражаты есебінен бұзу туралы хабарлама бергенін айтады. Алайда, олар хабарламаны алғанмен оны орындамаған. Соған байланысты сот шешімімен саябақтың жер телімінде орналасқан аттракциондар мен басқа да құрылыс нысандары күшпен бұзылып, мемлекетке бастапқы күйінде қайтарылатын болады.

ШЫМКЕНТ