Қасым-Жомарт Тоқаевтың Ақордадағы келелі кездесулер кезегі Солтүстік Македония Президенті Гордана Силяновска-Давковамен жалғасты.

Мемлекет басшысы мәртебелі мейманға ілтипат білдіріп, оның сапары Астана мен Скопье арасындағы дипломатиялық қарым-қатынастың 30 жылдығы қарсаңында өтіп жатқанын атап өтті. Сондай-ақ серіктестікті дамытуға мүдделі екенін жеткізді. Гордана Силяновска-Давкова да екі жақты ықпалдастықты одан әрі нығайтуға зор әлеует бар екенін мәлімдеді. Тараптар сауда-экономикалық, инвестициялық және гуманитарлық салалардағы ынтымақтастықты егжей-тегжейлі талқылады. Бұған қоса қарым-қатынастың барлық саласына тың серпін беруге уағдаласты. Әсіресе ауыл шаруашылығы, көлік-логистика, қаржы және туризм сияқты перспективті бағыттарға назар аударылды. Мұнан бөлек Солтүстік Македонияның танымал Alkaloid фармацевтикалық компаниясының Алматыда өкілдік ашу туралы шешімін құптады.