Премьер-министр Олжас Бектенов Каспий құбыр консорциумының (КҚК) бас директоры Николай Горбаньмен кездесу өткізіп, мұнай тасымалы саласындағы ынтымақтастық пен инвестициялық жобалардың жүзеге асырылу барысын талқылады, деп хабарлайды Egemen.kz

Кездесуде «Теңіз–Новороссийск» бағыты бойынша мұнай құбырын жаңғырту қарқыны мен қолданыстағы және болашағы бар инвестициялық бағдарламаларды жаңғырту қарқыны қаралған. Николай Горбань 2024 жылдың нәтижелері бойынша ақпарат беріп, «Кропоткинская» мұнай айдау стансасындағы қалпына келтіру жұмыстарының аяқталғанын хабарлады.

Сондай-ақ, «ҚазТрансОйл» АҚ мен КҚК арасындағы әріптестік аясында 2024 жылы екі жүйені байланыстыратын жаңа мұнай құбырының құрылысы аяқталып, пайдалануға берілгені айтылды. Бұл жоба Т.Қасымов атындағы мұнай айдау стансасын КҚК құбырына қосуға мүмкіндік берді.

«Бүгінде айдау көлемін жылына 67 млн тоннадан 81,5 млн тоннаға дейін, оның ішінде қазақстандық учаске бойынша жылына 53,7 млн тоннадан 72,5 млн тоннаға дейін арттыруға техникалық мүмкіндік қамтамасыз етілді. КҚК мұнай құбырының «тар» тұстарын жою жобасын іске асыру нәтижесінде биылғы қазан айында мұнай жөнелту көлемін 1 млрд тоннаға дейін жеткізу жоспарланып отыр», делінген хабарламада.

Премьер-министр Олжас Бектенов КҚК құбырының Қазақстан мұнай экспорты үшін стратегиялық маңызын атап өтіп, Үкімет тарапынан барлық қажетті қолдау көрсетілетінін жеткізді.

Кездесуде консорциумның әлеуметтік жауапкершілігі де назардан тыс қалмады. Атап айтқанда, Атырау қаласында 900 орындық мектеп салу жұмыстары жүргізіліп жатыр. Өткен жылы КҚК тарапынан әлеуметтік жобаларға 4,4 млрд теңге бөлінген. Ал 2025 жылы білім беру мен медициналық инфрақұрылымды дамытуға бағытталған жаңа жобалар қолға алынбақ.

Келіссөздер қорытындысында тараптар мұнай тасымалы саласындағы өзара іс-қимылды одан әрі нығайтуға ниетті екенін білдірді.