Оқыс оқиға кеше елордадағы көп қабатты тұрғын үйлердің бірінде болған. Бұл ақпаратты қалалық полиция растап отыр, деп хабалайды Skifnews.kz ақпарат порталы.

— 26 тамызда елордада көпқабатты тұрғын үйдің алтыншы қабатындағы терезеден үш жастағы бала құлап, алған жарақаттар салдарынан оқиға орнында қаза тапты. Белгілі болғандай, оқиға кезінде үйде ата-анасы болмаған, балаға оның 7 жастағы ағасы қарап отырған, — делінген хабарламада.

Осы орайда Астана қалалық полициясы қауіпсіздік шараларын қатаң сақтау қажеттігін еске салады.

— Мұндай жағдайдың басым бөлігі ересектердің жеткіліксіз назарынан, немқұрайдылығынан және қарапайым сақтық шараларын сақтамау салдарынан болып жатады. Құрметті ата-ана, бала қауіпсіздігі сіздің қолыңызда. Тек ересектердің қырағылығы мен жауапкершілігі ғана қайғылы оқиғаның алдын алады, — дейді полициядан.

Айта кетсек, елордада жыл басынан бері 13 бала терезеден құлап, көз жұмды.