Мемлекет басшысы Қасым-Жомарт Тоқаевтың бастамасымен 2025 жыл Қазақстанда «Жұмысшы мамандықтары жылы» болып жарияланды. Осы бастаманы қолдау мақсатында «AMANAT» партиясының Жамбыл облыстық филиалы Тараз қаласындағы «Қазфосфат» минералды тыңайтқыштар зауытының өндіріс аумағында «Жұмысшы жастар аманаты» атты облыстық форум өткізді, деп хабарлайды Egemen.kz.

Бұған дейін «AMANAT» партиясы Үкіметпен бірлесе отырып, жұмысшы жастардың әлеуметтік мәселелерін шешу және кәсіби әлеуетін арттыруға бағытталған «Жұмысшы жастар аманаты» жобасын іске қосқан болатын. Жамбылдағы бұл форум аталған жобаны жүйелі жүзеге асыру жолындағы нақты іс-шараның бірі.

Алғашқы сөз кезегін Мәжіліс депутаты, «AMANAT» партиясы фракциясының мүшесі Мұқаш Ескендіров алып, өз ісінің шебері болудың мән-маңызына тоқталды. Ол жастарды еліміздің дамуы жолында аянбай еңбек етуге шақырды.

«Елімізде жыл сайын ауқымды жобалар жүзеге асырылып жатыр. Оның бірқатары осы Жамбыл облысында қолға алынуда. Бұл жобаларды жүйелі жүзеге асыру үшін, әрине жұмысшы жастар қажет. Сондықтан Қазақстанның болашағы – жұмысшы мамандық иелерімен тікелей байланысты. Қазірдің өзінде қоғамда өндіріс саласының мамандары ерекше бағаланады. Ал осындай іс-шаралар арқылы белсенді жастарды қолдау ісіне жарқын жол ашылып отыр. Себебі өмірде барлық жетістік тек адал еңбекпен, қажырлы қызметпен келеді», деді депутат.

«Жастар Рухы» жастар қанатының төрайымы Ақерке Искандерова да сөз сөйлеп, еңбек жолында жүрген жастарға мемлекет тарапынан жан-жақты қолдау көрсетіліп жатқанын атап өтті.

«Бұл форум – жұмысшы жастардың дауысы естілетін, олардың болашағына қатысты мәселелер талқыланатын алаң. Жыл өткен сайын елімізде еңбек адамына деген құрмет пен кәсіптік білімге деген сұраныс арта түсуде. Осы орайда, «Жастар Рухы» жастар қанаты өндіріс саласында еңбек ететін жастардың әлеуетін ашу мақсатында нақты жұмыс атқарып келеді. Мәселен, дәстүрлі «Жастарға жұмыс» жобасы аясында еліміздің барлық аймағында ауқымды бос жұмыс орындары жәрмеңкелері өткізіледі. Жуырда Астана қаласында өткен осындай жәрмеңкеге 3000-ға жуық адам қатысып, 70-тен астам кәсіпорын 2000-нан астам бос жұмыс орнын ұсынды», деді ол.

«Жастарға жұмыс» жобасы екі жыл ішінде өз тиімділігін дәлелдеді. Осы уақыт аралығында 150 мыңға жуық жас қамтылған 1,5 мыңнан астам іс-шара ұйымдастырылды. 200-ге жуық жәрмеңке өткізіліп, оған 5,2 мыңнан астам ұйым қатысқан. Соның нәтижесінде 55 мыңнан аса жас тұрақты жұмысқа орналастырылды. Сондай-ақ шалғай ауылдардағы жастарды қамту үшін «Жастар Рухы» мобильді топтары 150-ден астам елді мекенге барып, 55 мың адамға әлеуметтік және еңбек саласына қатысты кеңестер берді.

Осыған қоса, аймақтық форумдар өтіп, еңбек нарығына байланысты ашық пікірталастар жүргізілді. Елдің сегіз өңірінде ірі кәсіпорындарда жастар мен мектеп оқушылары үшін кәсіптік бағдар беру экскурсиялары ұйымдастырылды. Нәтижесінде 5000-нан астам жас еңбек нарығы туралы толық мәлімет алып, олардың 180-нен астамы тұрақты жұмысқа орналасты. Ал жұмысшы мамандықтарының абыройын көтеру мақсатында «Жастар Рухы» «Еңбек даңқы: Жұмысшы мамандар әулеті» атты арнайы медиа-жобаны жүзеге асырды.

Жамбыл облысы әкімінің орынбасары Қанатбек Мәдібек форум барысында аймақта жұмысшы жастарға қолдау бағытында нақты шаралар қолға алынып жатқанын жеткізді.

«Бүгінде Жамбыл облысында инвестиция тарту бағытында жоспарлы жұмыс жүргізілуде. Алдағы уақытта өңірде 62 инвестициялық жобаны қолға алу көзделіп отыр. Оны жүзеге асыру барысында 6 мыңға жуық жұмыс орны ашылады. Яғни, бұл қадам университет пен колледж түлектерін жыл сайын жұмысқа орналастыруға мүмкіндік береді. Осы орайда, өңірдегі жоғары оқу орындарында кадр дайындау жұмысы қолға алынуда. Біздің басты міндетіміз – кәсіби мамандардың жаңа буынын тәрбиелеу және олардың бойына адалдық, жауапкершілік сынды асыл қасиеттерді сіңіру», деді ол.

Қазіргі таңда Жамбыл облысында 355 мыңнан астам жас тұрады, бұл – өңір халқының 29,1 пайызы. Оның ішінде 41,8%-ы қалада, ал 58,2%-ы ауылдық жерде өмір сүруде. Форумда сөз алған жас мамандар да өз тәжірибесімен бөлісті.

«TALAS INVESTMENT COMPANY» ЖШС-нің қызметкері Бексұлтан Болғанбек еңбек жолын слесарь болып бастап, кейіннен қазандық операторы, тоңазытқыш қондырғылары аумағының шебері сияқты түрлі сатылардан өтіп, бүгінде энергетика ресурстарымен қамтамасыз ету цехы бастығының орынбасары қызметін атқарып жүр.

«Бұл кәсіпорында жүздеген маман еңбек етеді. Солардың қатарында мен де бармын. Еңбек жолымды слесарь ретінде бастап, кейін қазандық операторы, компрессорлық және тоңазытқыш қондырғылары аумағының шебері, қазандық аумағының шебері болып жұмыс істедім. Бүгінде энергетика ресурстарымен қамтамасыз ету цехы бастығының орынбасары қызметін абыроймен атқарып жүрмін. Осындай ірі өндіріс орнында еңбек ету – жас мамандар үшін зор мәртебе әрі жоғары жауапкершілік. Компания бізге барынша қолайлы жағдай жасап отыр. Мұнда кәсіптік машығымызды жетілдіруге қажет барлық мүмкіндік бар. Ұжымымызға білікті, адал жұмысшы жастар қашан да қажет», деді ол.

Ал «Казфосфат» ЖШС-не қарасты зауыттың инженері Қайсар Алдахметовтің айтуынша, кәсіпорында 35 жасқа дейінгі 1128 маман еңбек етіп жатыр.

«Жұмысшы жастар – адалдық пен табандылықтың үлгісі. Зауыттарда, құрылыс алаңдарында, ауыл шаруашылығы саласында және түрлі өндіріс орнында еңбек етіп жүрген жас буын – ел экономикасының тірегі. Жұмысшы маман бола жүріп, қоғам дамуына да үлес қосуға, бойдағы қабілет пен әлеуетті көрсетуге толық мүмкіндік бар. Мысалы, мен қарапайым зауыт жұмысшысы бола жүріп, Тараз қалалық мәслихатының депутаты ретінде сайландым. Бүгінде қала тұрғындарының сенімін арқалаған азамат ретінде өндіріс саласында еңбек етіп жүрген жастардың мүддесін қорғап, олардың әлеуметтік мәселелерін шешуге атсалысып келемін», деді ол.

Форум барысында жұмысшы жастардың әлеуетін арттыру, оларды қолдау және еңбек құндылығын дәріптеу бағытында нақты ұсыныстар айтылды.