Опера әншісі Майра Мұхамедқызы Қытай Сиань консерваториясының профессор атағымен менде марапатталды.

Өнер иесі қуанышты жаңалығымен әлеуметтік желідегі парақшасында бөлісті, деп хабарлайды Caravan.kz медиа порталы.

Әнші Қытайдың Сиань қаласында шеберлік сағаттарын өткізіп тұратынын да айтты. Сондай-ақ, ол әр сағатқа қомақты қаражат алатынын да меңзеді.

“Құрметті достар! Сүйінші!!!!

21 мамыр –Мәдениет және өнер қызметкерлерінің күні еліміздің мәдениет майталмандары марапатталып жатқанда, Қытай Сиань консерваториясының профессор атағымен менде марапатталдым.

Бұл консерваторияда 6000 болашақ музыканттар өз мамандығы бойынша оқитын білім ордасы. Консерваторияға түсу бақыты сол адамның маңдайына қонатын бақ. Әсіресе, бұл білім ордасында профессор болу деген енді сөзбен жеткізе алмаймын. Осыдан 11 жыл бұрын Қырғызстан ұлттық консерваторияның профессоры атанғам. Ал біздің Астанадағы Шабыт ұлттық консерваторияда қанша жыл жұмыс істеп, Шакірттерім халықаралық конкурстарда 1-орын алсада бір жапырақ алғыс хат беруге жарымаған. Бірақ, Шүкір! Халықтың махаббатынан артық не керек деп жүре бердік.

Алла қаласа Сиань да жылына кем дегенде екі рет барып мастер класс беріп тұрамын. Ал әр сағаттың бағасын айтсам біреулер депрессияға түсіп кетуі мүмкін. Аллама мың шүкір! Абырой биігінен түсірмесін.

Шымкент операмен біраз театрлар арасында меморандумға отырдық. Жақсы күндер әлі алда! Шымкент операны әлемдік театр қатарына қосқаным қосқан! Айтпақшы, Сиань ға оқуға түсетін талантты жастар болса көмектесемін”, — деп жазды ол.

Әншінің оқырмандары мен желі қолданушылары оны құрметті атағымен құттықтауда.

”Құтты болсын, әттең, тек шет елдерден құрмет көріп жүрсіз. Кім көрінгенге атақ бергенше сізге бермей ме”, “Мәдениет министрлігі неге талантты, еңбегі сіңген адамды бағаламай отыр. Бір киноның эпизодын ойнағандар атақ алып жатыр”, “Жарайсыз, Қытайдан атақ алу оңай емес. Бірақ Қазақстанға талантыңызды дәлелдеу одан да қиын болып жатыр”, — деп жазды олар.