0:00:00

Жаңалықтарды Telegram арнамыздан оқыңыз!

Халықаралық панорама. Сарапшылар соғысты, дәлірегі – атысты тоқтатуға талпыныстан түк шықпайтынын жазады. Ресейдің уақыт созып отырғанын. Оларға оқ атуды ешқандай шартсыз 30 күнге тоқтату ұсынысының өзі өтпей отыр.

Ал Киев бірден келіскен. Еуропа лидерлерінің «жойқын санкциялар» қолданатындарын қайта-қайта айтып, ультиматум қоятындары «...керуен көшедіні» еске түсіреді. Ресей ұсынысымен Стамбұлда ұйымдастырылған екіжақты кездесудің қалай өткені мәлім – 1000/1000 есебімен тұтқын алмасу келісімінен басқа айтатын ешнәрсе жоқ.

Айтпақшы, тұтқын алмасу басталды. Иә дүйсенбіде Д.Трамп пен В.Путин телефонмен кезекті рет сөйлескен. АҚШ президенті негіздемесі жоқ жалынды сөздерін аямады: «Ресей мен Украина оқ атуды, одан да маңыздысы – соғысты тоқтату үшін келіссөздерді шұғыл бастайды» деп. Бұл әрине оның аудиторияға арналған кезекті пафосқа толы сөздері.

Шын мәнінде Д.Трамп Еуропа лидерлеріне, Украина президентіне Ресейдің соғысты тоқтатуға бейіл еместігін айтып, олардың төбесінен жай түскендей болған деген ақпарат та тарады...

Осы жұмада «Би Би Си» журналисі Стив Розенберг Ресей сыртқы істер министрі С.Лавровтан «Ресей келіссөздер үстеліне отырып, президент Зеленскиймен бейбіт келісімге қол қоя ма?» деп сұраған. Лавров: «Сіз арбаны аттың алдына шығарып тұрсыз. Әуелі келісім керек. Ал ол қашан дайын болады, біз шешеміз. Бірақ Зеленский, Путин бірнеше рет айтқандай, заңды президент емес, сондықтан сайлау өткізу оңтайлы шешім болар еді» деген.

Ал агрессияға қарсы шығып, соғысып жатқан Украина сайлау өткізе алмайды. Конституцияға қайшы.

Сонымен соғысты бір тәулікте тоқтататын Д.Трамп міне 4 айдан асты, ешнәрсе істей алмай отыр. Ең «қызығы» — ресейлік әріптесі туралы айтқанда айрықша ілтипаттың байқалатыны.

Олардың телефонмен соңғы әңгімесінен кейін Путиннің кеңесшісі Ю.Ушаков «Трамп Ресейді Американың сауда-экономикалық бағыттағы маңызды әріптесі санайды» деген. Демек Украинадағы соғыс тоқтай ма, жоқ па, Трамп Ресеймен жақындасуды әрі қарай да жалғастырмақ. Саяси қысым жоғалып барады...