Қазақстандық судья сот отырысында оғаш қимыл көрсеткені үшін сынға қалды. Әңгіме Алматы сотының судьясы Бақытжан Бақырбаев туралы болып отыр. Ол сот процесі барысында төрт саусағын көлденең айқастырып, әдетте "тор" деп түсіндірілетін қимылды жасаған, — деп хабарлайды Massaget.kz тілшісі.

Бақытжан Бақырбаевтың әрекеті видеоға түсіп қалған. Видео желіде тарады.

Алматы сотының баспасөз қызметі мәліметінше, видео 2024 жылы өткен процесте түсірілген. Ол кезде үш айыпталушыға қатысты бұлтартпау шарасын қамауда ұстауға өзгерту туралы өтініш қаралған.

"Сот отырысы барысында қатысушылардың бірі залдан шығып кетуге әрекет жасады. Сол кезде судья қимылмен мұндай әрекеттерге жол берілмейтінін көрсетті, өйткені ол сәтте бұлтартпау шарасын қамауда ұстауға өзгерту мәселесі талқыланып жатқан болатын. Көрсетілген қимыл тек тәртіпті сақтау және процестің тиісті өтуін қамтамасыз ету мақсатында жасалды", – деп түсіндірді судьяның әрекетін соттың баспасөз қызметі.

Сондай-ақ, соттың баспасөз қызметі мәліметінше, істі қарау барысында судьяның сот отырысындағы мінез-құлқына шағым түскен.

"Судья әдебі жөніндегі комиссияның қарауынан кейін судьяның кейбір әрекеттеріне қоғамдық айыптау жарияланды, — деді Алматы қалалық соты өкілі.

Еске салайық, бұған дейін Берденовке қатысты істегі судья журналиске тілін шығарғаны хабарланды.

Қызықты жаңалықтар мен видеоларды көру үшін TikTok арнамызға жазылыңыз!