Куруглиев күміс, Айтанов қола жүлдегер.
Болгарияның Самоков қаласында күрес түрлерінен жастар арасындағы дүниежүзілік дода жалғасып жатыр. Жарыстың кезекті күні еркін күрес бойынша соңғы медальдар сарапқа салынды. Қазақстан құрамасының өкілдері тағы екі медаль жеңіп алды. Атап айтқанда, 92 келідегі Камиль Куруглиев финалға дейін жетіп, ақтық сында өзбекстандық Шерзод Поеновқа есе жіберді. Қорытынды есеп 3:2. Осылайша Камиль күміс жүлдегер атанды. Артынша 57 келідегі Нұрданат Айтанов қола жүлдеге қол созды. Жалпы алғанда биылғы әлем чемпионатынан еркін күрес шеберлері 5 медаль жеңіп алды. Оның біреуі алтын. Күні кеше ауыр салмақтағы Едіге Қасымбек топ жарған болатын. Едігенің алтынын тарихи жетістік деуге де болады. Өйткені тәуелсіздік алған жылдардан бері дәл осы салмақта жастар арасындағы әлем чемпионымыз болмады. Бұған қоса қоржынымызда 1 күміс және 3 қола бар. Күмісті жоғарыда айтқан Камиль Куруглиев, ал, қолаларды Нұрданат Айтанов, Самир Дурсунов және Досжан Құлғайып жеңіп алды.
Чемпиондар лигасы: «Қайрат» пен «Селтик» кездеседі
Бүгін «Қайрат» пен «Селтик» кездеседі. Қос команда УЕФА Чемпиондар Лигасының плей-офф кезеңі аясында жолығады және жеңіске жеткен тарап топтық кезеңге жолдама алады. Алғашқы матч Шотландияның Глазго қаласында болады. Рафаэль Уразбахтин баптайтын жігіттер қазір матч өтетін жерге жетті және ойын алындағы дайындықты пысқытап жатыр. Алматылық команда бұған дейін «Олимпиа», «Купс» және «Слован» командаларын жеңіп, плей-олфф кезеңіне өткен еді. Ал «Селтик» Чемпиондар Лигасындағы жарысты бірден осы кезеңнен бастайды. Көпшілік тағатсыздана күтіп отырған матч түнгі 12:00-де басталады. Тура бір аптадан кейін, 27 тамызда қос команда Алматыда жолығады. Айта кетейік, «Қайраттың» осы деңгейге жетуінің өзі тарихи жетістік саналады. Өйткені алғаш рет Чемпиондар лигасының плей-оффында өнер көрсетуіге мүмкіндік алды. Тағы бір айта кетерлігі осы жетістігі үшін алмптылық клубқа УЕФА тарапынан 4 млн 290 мың еуро көлемінде сыйақы беріледі. Ұлттық валютаға шаққанда 2 млрд 690 млн теңгені құрайды.
Көкпардан жасөспірімдер арасындағы ел біріншілігі
Түркістан, Жамбыл, Алматы және Батыс Қазақстан облыстары үздіктер қатарында. Талғар қаласында көкпардан жасөспірімдер арасындағы Қазақстан чемпионаты жалғасып жатыр. Бүгінге дейін топтық кезең кездесулері өтті. Әсіресе жоғарыда аты аталған командалар қарсыластарын ірі есеп айырмасымен жеңіп жатыр. Мәселен, Түркістан жігіттері Атырауды 17:1, Шымкентті 14:1 есебімен ұтты. Дәл солай Жамбыл командасы Қарағандыны 10:1, ал Қостанайды 11:2 есебімен жеңді. Алматы қаласының көкпаршылары да өте белсенді. Алматы-Маңғыстау кезедесуінде 8:0, Алматы-Қызылорда кездесуінде 10:1 есебі тіркелді. Ал биылғы жарыстың басты жаңалығы деп Батыс Қазақстан облысының нәтижелерін айтуға болады. Оралдан келген жігіттер Жетісу және Ұлытау командаларын жоғарыдағыдай айқын басымдықпен жеңіп, алғаш рет фавориттердің қатарына қосылды. Бүгін топтық кезең аясындағы соңғы кездесулер болады. Одан кейін қайтадан жеребе тартылып, плей-офф кезеңіндегі қарсыластар анықталады. Жасөспірімдер арасындағы жарыстың жалпы қорытындысы 23 тамызда белгілі болады.
Нұркен Байбөриев, ҚР Мемлекеттік жаттықтырушысы
