Ердоған Трамп пен Путин саммитіне қатысты пікір білдірді

16.08.2025

Түркия президенті Режеп Тайып Ердоған АҚШ пен Ресей көшбасшылары Дональд Трамп пен Владимир Путиннің Аляскада өткен келіссөздеріне пікір білдірді, — деп хабарлайды Massaget.kz тілшісі.

Ердоған өз ойын Х әлеуметтік желісінде жазды.

"АҚШ президенті Трамп пен Ресей Федерациясының президенті Путиннің Аляскада өткен келіссөздері Ресей мен Украина арасындағы соғысты тоқтатудың жаңа жолдарын іздеуге тың серпін берді", – деді ол.

Ердоғанның айтуынша, Түркия бұл саммитті құптайды және Украина президенті Владимир Зеленскийдің қатысуымен басталған жаңа процесс "тұрақты бейбітшілікке негіз болады" деп үміттенеді.

Сонымен қатар, ол Анкара бейбітшілік орнатуға кез келген үлесін қосуға дайын екенін атап өтті.

Еске салайық, Аляскадағы келіссөздерден кейін Дональд Трамп бұл кездесуді "өте табысты әрі керемет күн" деп бағалады. Ол дүйсенбіде Вашингтонда Зеленскиймен кездесетінін және жағдай сәтті өрбісе, Ресей көшбасшысымен жаңа келіссөз ұйымдастыратынын айтты. Сондай-ақ Ақ үй басшысы "бес соғысты тоқтаттым" деп мәлімдеп, Нобель сыйлығына құқы барын меңзеді.

Аптаның басты оқиғалары мен пайдалы видеоларды көру үшін YouTube арнамызға жазылыңыз

Logotype Massaget

Related to this topic:

Latest to this topic: