Қазақ әуені Майндағы Франкфурт көгінде қалықтады. Доктор Хох атындағы беделді консерватория залында композитор Нұрғиса Тілендиевтің 100 жылдық мерейтойына арналған шығармашылық кеш өтті, деп хабарлайды 24KZ.

Шараға Ақмола облысы әкімдігінің қолдауымен Франкфурттегі Қазақстан Елшілігі мұрындық болды. Елге белгілі «ORDA» этно-тобы кештің көркін қыздырды. Олар халық әндерінен шашу шашып, күмбірлеген күйімен көпшілікке керемет әсер сыйлады. Ұлттық нақышта әрленген неміс композиторларының шығармаларын шебер орындап, көптің көңілін баурады. Өнерпаздардың өнерін тамашалауға жергілікті тұрғындардан бөлек, мәдениет қайраткерлері мен дипломаттар жиналды.

Тауболды Үмбетбаев, Майндағы Франкфурт қаласындағы ҚР Бас консулы:

- Қазақстан мен Германия арасындағы бүгінгі күнгі әріптестік жоғары деңгейде. Қазақстан Президенті Германияда болды, білесіздер. Неміс тарапы да, үкіметі де, Президенті алдыңғы жылы Қазақстанға барып келді. Бізде экономика жағынан үлкен жұмыс жүріп жатыр. Ал мына мәдени қарым-қатынас – ол өте биік тұрған жағдай. Қазақстаннан көшіп келген мыңнан, миллионнан астам азаматымыз осы жерде, біздің арамызда қазір байланыс жасаса, мына мәдени іс-шара, концерт, қазақтың этно-фольклорлық музыкалар – ол біздің екі арадағы көпір деп атауға болады.