7 тамызда АҚШ-тың Норвуд қаласында мәнерлеп сырғанаудан «ISU Cranberry Cup International 2025» турнирі басталады, деп хабарлайды Egemen.kz.

Осы спорт түрінің жұлдыздары жиналатын жарыста Қазақстанның туы астында Софья Самоделкина өнер көрсетеді.

18 жасар спортшы биыл Туринде алауы тұтанған Дүниежүзілік Универсиадада қола медальді иеленіп, өзінің мансабындағы ең зор атаққа қол жеткізді. Оған дейін бірқатар халықаралық турнирлерде табысқа жетті. Былтыр әйелдер арасындағы қысқы Қазақстан чемпионатында топ жарды. Ал әлем чемпионатын Софья 14 орынмен қорытындылап, келесі жылы өтетін Олимпия ойындарының лицензиясына иелік етті.

Норвудта Софья Самоделкина жеңіс тұғырына көтерілуді көздеп отыр. Ертең басталатын бұл жарыс 9 тамызда өз мәресіне жетеді.