Алматы халықаралық әуежайында ауқымды қайта жаңғырту жұмыстары жүргізіледі.

Мұндағы инфрақұрылымды 2050 жылға дейін кезең-кезеңімен жаңарту көзделген. Осы уақыт аралығында жаңа ұшу-қону жолақтарын салу, ішкі рейстер терминалын жөндеу, көпдеңгейлі автотұрақ пен қонақүй тұрғызу жоспарда бар. Бұған қоса, әуежай аумағында медициналық және оқу орталықтары ашылады, оның ішінде авиация мамандарын даярлайтын аккредиттелген академия да болады. Жобаның алғашқы кезеңінде 362 млн АҚШ доллары көлемінде инвестиция құйылады. Бұл бастама мемлекеттік бюджетке салмақ салмай, жекеменшік инвестициялар мен несиелер есебінен жүзеге асады.

Гокер Косе, Алматы халықаралық әуежайының Президенті:

- Жоба өңір экономикасының дамуына елеулі үлес қосады. Алматы әуежайы – Орталық Азиядағы жүктемесі ең жоғары әуежай саналады. Біз бұл қарқынды төмендетпеуіміз керек. Біз тек терминалдарды жаңартып жатқан жоқпыз – біз тұтас бір экожүйе қалыптастырамыз. Логистикалық және индустриялық хаб, шудан қорғау жобалары, жаңа жұмыс орындары ашылып, әуе тасымалдаушылар мен жолаушылар үшін заманауи жағдайлар жасалмақ.