Атырау облысында Тимур Құлыбаевқа тиесілі жер телімі мемлекет меншігіне қайтарылды. Бұл туралы өңірлік прокуратураның өкілдері хабарлады. «Кипрос» компаниясының 3,46 гектар жері пайдаланылмай бос жатқан. Онда құны 250 миллион теңге болатын пирс салынуы керек еді. Ұзаққа созылған сот процесінен кейін жерді қайтару туралы шешім қабылданды. Сондай-ақ аймақтағы жалпы көлемі 31 гектарды құрайтын, құны 196 миллион теңге болатын 16 жер учаскесі мемлекет меншігіне қайтарылды. Бұл учаскелер де жер заңнамасының талаптарына сәйкес пайдаланылмаған. Бұдан бөлек «Ұлттық индустриялық мұнай-химия технопаркі» арнайы экономикалық аймағын тексеру кезінде сенімгерлік басқару шарты бұзылғаны анықталды. Нәтижесінде «Атырау Нефтехим-ге» тиесілі, құны 1,6 миллиард теңге тұратын 106 гектар жер учаскесі аймақ меншігіне қайтарылды. Компания міндеттемелерін орындамағандықтан, арнайы экономикалық аймақ қатысушылары қатарынан шығарылды.

Асылбек Данияр