Облыс орталығында бой көтерген алғашқы заманауи қоймада бір мезетте мыңдаған дәрі-дәрмек түрін жинақтап, таратуға болады, деп хабарлайды 24kz.

Әсіресе, медициналық препараттарды шалғайдағы ауыл-аймаққа уақытылы жеткізуге ықпал етеді.

Фармацевтикалық-логистикалық хаб Өскеменнің индустриялық аймағында салынған ең алғашқы кешен. 7 мың шаршы метр аумақты қамтиды. Қойма іші кең әрі сыйымды. Жинақталған дәрі-дәрмектің бәрі осы жерден жан-жаққа жол тартады. Мамандар автоматтандырылған құрылғымен жұмыс істейді. Сондықтан қажетті тапсырысты орындауға көп уақыт кетпейді.

Адам денсаулығы үшін ауадай қажет дәрі-дәрмектің әрбірі тиімді температуралық режімде сақталады.

Абзал Мұсылманқұлов, қойма меңгерушісі:

- ШҚО бойынша әрбір екінші дәрі осы қойма арқылы өтеді деп нақты айтуға болады. Стратегиялық маңызы үлкен деп ойлаймын. Осындай «А» класындағы қойманың ең алғаш ашылуы бұл ШҚО бойынша және біз осындай қойма арқылы сапалы дәрімен халықты қамтамасыз етуге тырысамыз.

Өңірде тегін дәріге мұқтаж жан көп. Бұл тізімде 120 мың адам бар. Дені шалғайдағы ауыл-аймақта тұрады. Демек, дәрі-дәрмектің дер кезінде жетуін қамтамасыз ету ең алдымен осы кешеннен басталмақ.

Жақсылық Омар, ШҚО әкімінің орынбасары:

- Бұл, әрине, науқастар үшін, тұрғындар үшін біздің өте қолайлы жасалған жағдай және екіншіден, бұл жерде 100-ден астам біздің азаматтарымыз жұмыспен қамтылатын болады, үшіншіден, бұл біздің қаламызға өңірімізге құйылып жатқан жекеменшік инвестиция.

Фармацевтикалық торапты салуға 4 миллиард теңге жұмсалды. Кешеннің іске қосылуы қаланың индустриялық аймағында отандық өндірістің дамуына түрткі болмақ.

Эльмира Ахметова, тілші:

- Сала өкілдерінің айтуынша, талай жыл бос тұрып, енді іске жарай бастаған индустриялық аймақта алдағы уақытта бірнеше ірі мекемелер бой көтереді. Мәселен болашақта кірпіш зауыты салынып, мал соятын орын да жабдықталуы мүмкін.

Авторлары: Эльмира Ахметова, Дмитрий Пыхтин