Енді жаңа көлік сатып алу үшін құжат жинап, халыққа қызмет көрсету орталығына сабылудың қажеті жоқ. Еуразиялық банк пен Allur компаниясы еліміздегі алғашқы толық цифрлық автонесиені іске қосты. Бұған дейін тек жүрілген көліктерге ғана онлайн тіркеу мүмкіндігі болған. Енді Allur автосалондарында жаңа көлікті несиеге рәсімдеу, тіркеу және мемлекеттік нөмір алу онлайн жүзеге асады.

Енді автосалоннан ұнаған көлігіңізді таңдасаңыз жеткілікті. Әрі қарайғы рәсімдер бір сағаттың ішінде аяқталады. Бәрі бір платформада жүзеге асады.

Ләззат Сатиева, еуразиялық банктің басқарма төрағасы:

Мұндай қызмет ешқандай банк, ешқандай диллерлік орталықта болмаған. Біз оны алғашқылардың бірі болып енгізіп отырмыз. Серіктестерімізбен бірге көлік сатып алу жолын барынша жеңілдеттік. Eurasian Drive мемлекеттік талаптарға сай, сатып алушының деректері қорғалады.

Автонесие рәсімдегісі келетіндерге банктың қоятын бірнеше талабы бар.

Лимара Жақсыбаева, еуразиялық банктің Астана қаласындағы филиалы директорының орынбасары:

Талаптар: біріншіден, клиентіміз Қазақстан Республикасының азаматы болуы керек. Екіншіден, тұрақты табысы болуы керек. Үшіншіден, кредиттік тарихы жақсы болу керек.

Жүйе толық автоматтандырылған. Клиенттен тек ЖСН мен телефон нөмірі және электрондық цифрлық қолтаңба керек. Бастапқы жарнаны банк картасымен немесе автосалон кассасында төлеуге болады. Барлық рәсім аяқталған соң, техпаспорт бірден цифрлық құжаттар бөліміне шығады. Ал мемлекеттік нөмір мен құжаттардың түпнұсқасын арнайы халыққа қызмет көрсету орталығынан алып кетесіз.

Милита Боше, Allur Finance сату бөлімінің басшысы:

Қазір бұл қызметті пайдаланып, көлігін онлайн рәсімдеген клиенттер бар. Еуразиялық банкке серіктестік пен технологиялық қолдау үшін алғыс білдіреміз.

Толық цифрлық автонесие – тек уақытты үнемдеп қана қоймай, клиент пен банк арасындағы байланысты мейлінше жеңілдетеді. Қызмет әзірге Allur-дың Алматы мен Астана қаласындағы автосалондарда қолжетімді.

Асылбек Данияр