Астанада Отан алдындағы борышын өтеп жүрген сарбаздардың аналары II республикалық форумда бас қосты, деп хабарлайды 24kz.

Онда армиядағы кем-кетікті түзеу, жауынгерлерге жағдай жасау және әскери гранттартың санын арттыру жөнінде мәселелер көтерілді. Жиынға Қорғаныс министрі Руслан Жақсылықовтан бастап өзге де күштік құрылымдардың өкілдері мен Мәжіліс депутаттары қатысты. Бүгінде арнайы құрылған «Аналар жүрегі» комитетінің филиалдары еліміздің барлық өңірінде бар. Олар Қазақстандағы кез келген әскери бөлімдер мен құрылымдарды, бөлімшелерді аралап, сарбаздармен әңгімелесіп, жағдайымен таныса алады.

Айнұр Баяхметқызы, «Аналар жүрегі» комитетінің Абай облысындағы өкілі:

- Биылғы форумның негізгі мақсаты – былтыр форумда көтерілген сұрақтарды қорытындылау және алдағы жұмыстарды жоспарлау. Жиын Аналар күніне орай ұйымдастырылғандықтан бүгін әскери қызметте үздік жетістікке көрсеткен сарбаздардың аналарын марапаттау рәсімі өтеді.

Айгүл Құспан, ҚР Парламенті Мәжілісінің депутаты:

- Бұлар өте тиімді жұмыс істейді. Бұлардың қазір кез келген әскери бөлімге ескертусіз баруға құқығы бар. Әрине, құпия жақтары мен қару-жарақты айтпағанда. Сарбаздардың жататын, ұйықтайтын, тамақтанатын жерлеріне бара алады. Психологтармен кездесіп, басшыларымен сөйлесе алады.