Жетісу облысында кәсіпкерді қорқытып, 10 млн теңге талап еткен блогер сотталды, деп хабарлайды KAZ.NUR.KZ облыстық соттың баспасөз қызметіне сілтеме жасап.

Жетісу облысы бойынша Қаратал аудандық сотында аса ірі мөлшердегі қаражатты қорқытып алуға қатысты қылмыстық іс қаралды.

Іс материалдарына сәйкес, 2024 жылы қараша айында әлеуметтік желіде 29 000-нан астам оқырманы бар блогер кәсіпкер К.-дан бұған дейін өзінің Instagram желісіндегі ZohanTV парақшасында Қаратал ауданындағы сапасыз құрылыс туралы жариялаған бейнематериалдарын өшіру үшін 10 млн теңге талап еткен. Сонымен қатар ол кәсіпкердің іскерлік беделіне нұқсан келтіруі мүмкін ұқсас материалдарды таратамын деп қорқытқан.

Полиция қызметкерлері күдіктіні ақша беру кезінде ұстаған.

Мемлекеттік айыптаушы сотталушыны кінәлі деп танып, оған 6 жыл 8 ай мерзімге бас бостандығынан айыру жазасын тағайындауды сұрады.

Жәбірленуші прокурордың жазалау шарасымен келісе отырып, моральдық және материалдық зиянды өндіру туралы азаматтық талапты қанағаттандыруды сұраған.

Қорғау тарабы ақтау үкімін шығаруды сұрады, ал сотталушы кінәсін мойындамай, өзін ақтауды сұрады.

Айта кетейік, Қылмыстық кодекс бойынша аталған қылмысты жасаған адам 5 жылдан 10 жылға дейін мүлкін тәркілей отырып бас бостандығынан айырылады.

Сотталушының кінәсі жәбірленушінің, куәлердің айғақтарымен және өзге де қылмыстық іс материалдарымен дәлелденген.

Сот үкімімен П. Қылмыстық кодекстің 194-бабы 3-бөлігі 2-тармағы бойынша кінәлі деп танылып, оған 6 жыл мерзімге бас бостандығынан айыру жазасы тағайындалды. Жазасын қауіпсіздігі орташа мекемеде жазасын өтейді.

Азаматтық талап ішінара қанағаттандырылып, 350 мың теңге өндірілді.

Үкім заңды күшіне енген жоқ.