Астанаға ресми сапармен Болгария Президенті Румен Радев келді. Мемлекет басшысы әріптесін Ақорда сарайында қарсы алды.

Салтанатты рәсім барысында президенттер бір-біріне ресми делегация мүшелерін таныстырып, екі елдің әнұрандары шырқалды. Келіссөз барысында Қасым-Жомарт Тоқаев Болгария Қазақстан үшін Еуропадағы ең маңызды серіктестерінің бірі екенін айтты. Сауда-саттық артып келеді. Біздің нарықта 60-қа жуық болгар компаниясы табысты жұмыс істеп жатыр. Президенттің айтуынша қазіргі уақытта тау-кен өнеркәсібі, өндіріс, көлік және құрылыс салаларында жемісті ынтымақтастық орнаған. Сонымен қатар энергетика, транспорт және логистика, атом өнеркәсібі мен цифрландыру бойынша ықпалдастықтың әлеуеті зор. Өз кезегінде Румен Радев Қазақстанды Орталық Азиядағы басты серіктесі санайтынын жеткізді.

Қасым-Жомарт Тоқаев, Қазақстан Республикасының Президенті:

Екі елді тамыры терең саяси және экономикалық ынтымақтастық байланыстырады. Әртүрлі саладағы екіжақты қарым-қатынастарымыз тұрақты дамып келеді. Мұны сенімді саяси диалогтан, парламенттер арасындағы нәтижелі ықпалдастықтан, сауда мен инвестицияның қарқынды өсуінен, халықтарымыздың байланысы мен әлемдік қоғамдастықтағы өзара қолдаудан анық аңғаруға болады.

Румен Радев, Болгария Президенті:

Мемлекетіңізді өркендетуге бағытталған ауқымды реформаларыңыз бен көреген саясатыңызды қолдаймын. Біз Қазақстанды Орталық Азиядағы басты серіктесіміз санаймыз. Сіздердің осыған дейінгі табыстарыңыз таңғаларлық: экономикаларыңыз қарқынды өсіп келеді, инновация, ғылым, білім, жоғары технология салаларында зор табысқа жеттіңіздер. Кеше мен Ғарыш орталығын аралап көрдім. Сіздердің жетістіктеріңізден жақсы әсер алдым.

Шерхан Жамбылұлы