Қазақстан футболының дамуына серпін беріп, жасөспірімдер арасында жаңа есімдердің танылуына мүмкіндік жасап келе жатқан QJ League жобасы биыл тағы бір ауқымды қадам жасады — арнайы қыздарға арналған лига құрылып, тұңғыш маусымының туын тікті. Бұл оқиға тек спорттық жарыс емес, жас футболшы қыздар үшін үлкен арманның бастамасы тәрізді, деп хабарлайды El.kz интернет порталы.

Ал QJ League Women лигасының салтанатты ашылу рәсімі Павлодар қаласындағы Орталық стадионда өтті. Бұл іс-шараға Павлодар облысының әкімі Асайын Байханов, Freedom QJ League қамқоршылық кеңесінің төрағасы Тимур Турлов пен лига президенті Рохус Шох және Қазақстан футбол федерациясының бас хатшысы, әрі еліміздің ардагер футболшысы Давид Лория қатысты. Олар жас спортшыларға сәттілік тілеп, жаңа жобаның маңызын атап өтті.

Оқи отырыңыз:

• Жаңа технология, қыздар лигасы: QJ League-тің үшінші маусымы несімен ерекшеленбек
• QJ League-те қыздар лигасы пайда болады – Рохус Шох

Тимур Турлов өз сөзінде бұл жобаның Қазақстанда әйелдер футболының дамуына зор үлес қосатынын алға тартты.

Елімізде әйелдер футболының қарқын алып келе жатқанын өздеріңіз де жақсы білесіздер. Осы тұрғыдан алғанда, биыл басталған қыздар лигасының да отандық футболдың даму деңгейіне әсер етеді деп сенеміз. Биыл қатарымызға бес команда қосылса, алдағы уақытта олардың саны көбейеді деген сенім бар. Бұл жоба жасөспірім қыздарымызға кәсіпқой футболға үлкен жол ашады деген үміт бар, — деді ол.

Жаңа маусым «Әйелдер футболы – жаздан да жарқын» ұранымен басталды. Лиганың алғашқы кезеңіне 8 команда қатысуда: «Ақтөбе», «Астана», «Жетісу», «Ертіс», «Қайрат», «Ордабасы», «Тобыл» және «Шахтер».

Лига президенті Рохус Шохтың айтуынша, бұл жоба – ұзақ күттірген арманның жүзеге асуы.

Жасөспірімдер турнирлері секілді қыздар лигасында да іссапарлар, қонақүйлерге орналасу және төрешілермен қамтамасыз ету, сонымен қатар тікелей трансляцияны ұйымдастыру шығындарын Freedom QJ League өз мойнына алады. Бұдан бөлек лига командаларды жаңа доптармен, жаттығу құрылғыларымен қамтамасыз етіп, маусым барысында мамандардың біліктілігін арттыруына жағдай жасайды, — деп атап өтті Шох.

Алғашқы ойын – жаңа тарих парағы

Маусымның алғашқы ойынында «Ертіс» командасы Қарағандының «Шахтерімен» кездесіп, 5:1 есебімен айқын жеңіске жетті. Лиганың алғашқы голын павлодарлық Елизавета Медведева соғып, жаңа кезеңге есік ашты. Артынша Аружан Оспанова мен 14 жастағы Айсана Ахмедиян дубль жасап, жасындай жарқылдады. Ал қонақтар тек бір голмен жауап қатты.

Аружан Оспанованың сөзінше, «Ертіс» «Шахтерді» бұған дейін де бірнеше рет ұтқан. Сондықтан бұл жолы да сол мақсатты көздепті.

Бапкерлердің айтқанын орындадық, соның арқасында жеңіске жеттік. Бастапқыда біраз абыржып қалғанымыз рас, себебі осынша көп жанкүйердің алдында бірінші рет ойнадық. Бірақ көп ұзамай жинақталып, өз ойын өрнегімізді көрсеттік. Бұйыртса, енді алғашқы маусымның жеңімпазы атансақ деген мақсат бар.

Осы орайда лига ұйымдастырушыларына рахмет айтамын. Себебі осы жобаның арқасында шыңдала түсеміз, тиісінше құрама бапкерлерінің көзіне түсуге мүмкіндік аламыз, ең бастысы, әйелдер футболының жаңа деңгейге шығуына жол ашылады деп ойлаймын, — деді Аружан.

Тағы бір дубль авторы атанған Айсана Ахмедиянның жасы небәрі 14-те. Футболмен айналысып бастағанына да бар-жоғы үш болыпты. Соған қарамастан мергендігімен көзге түсіп, болашағынан зор үміт күттіретін ойыншы екенін аңғартты.

Бұл менің алғашқы ойыным. Керемет әсер алдым. Көрерменнің қолдауы ерекше болды. Сондықтан осында келген жанкүйерлерге, достарыма, ата-анама, жақындарыма алғыс білдіремін. Мен үшін бүгін алаңға шығудың өзі үлкен оқиға. Өйткені мен 2011 жылғымын, ал мұнда 2008-2009 жылдары туған футболшылар ойнайды деген еді. Бірақ бапкер менің жасымдағы үш қызды қатарға қосып, бізге сенім артты, сол сенімді ақтағаныма қуаныштымын, — деді Айсана Ахмедиян.

Қақпадағы сенімді тірек — 15 жастағы Стелла Бабурчина-Луклянец. Ол — Қазақстан U-17 құрамасының ойыншысы, бірнеше жас ерекшелігі бойынша командаларда өнер көрсетеді. Лиганың алғашқы матчында да «Ертіс» қақпасы сенімді қолда екенін көрдік.

Стелла Бабурчина-Луклянецтің анасының сөзіне қарағанда, ол бала күнінде өзге қыздар секілді қуыршақ емес, доп ойнағанды жақсы көрген. Анасы қызының жарақат алып қалуынан қорықса да, оның қалауына қарсы келмепті.

Ана ретінде жарақат алып қалғанда, қатты алаңдайтынмын. Қақпада тұрудың техникасы, қолды қалай қою керектігін үйреткенше, облыстық балалар ауруханасының тұрақты «қонағы» болдық. Абырой болғанда, еш жері сынған жоқ, бірақ үсті-басы үнемі көгеріп келетін. Бастапқыда шабуыл шебінде ойнағандықтан, оның қақпаға ауысуына қарсы болдым. Алайда өзі тұрып алды, ұнайтынын айтты. Шүкір, қазір құрамада да, клубта да артылған сенімді ақтап келеді, — деді жас қақпашының анасы.

Әйелдер футболының ертеңі

Аталған жоба қыз балалардың спорттағы мүмкіндігін кеңейтетін, олардың бойындағы талантты ерте байқап, дамытуға бағытталған батыл қадам деген үміт бар. Бастысы, бұл қатардағы турнир ғана емес, жасөспірім қыздардың өз-өзіне деген сенімінің, оларды қолдаудың жарқын көрінісіне айналса екен.