Алматы облысындағы Іле-Алатауы ұлттық паркі аумағынан жыл басынан бері 180 тоннаға жуық қоқыс шығарылды. Бұл – қоршаған ортаны қорғау мақсатында жасалған үлкен шара, дейді парк қызметкерлері. Қазір туристік соқпақтар мен жаяу жүргіншілер жолын абаттандыру жұмыстары қарқынды жүріп жатыр. Қала тұрғындары мен қонақтары жиі саяхаттайтын Түргенсай шатқалындағы ерекше табиғаттың көрінісі әріптесім Айдана Қуантханның бейнематериалында .

Айдана Қуантхан, тілші:

Табиғаттың таңғажайып туындысы, Іле-Алатауының інжу-маржаны – Түргенсай шатқалы. Шаһардан 60 шақырым жерде орналасқан демалыс аймағына жылдың барлық мезгілінде келуші көп. Сәйкесінше, табиғатты аялау мақсатында мұнда апта сайын сенбілік ұйымдастырылады. Бүгін де қаладан арнайы келген студент- белсенділер аумаққа тазалық жұмыстарын жүргізді. Кейін қоршаған ортаға зиян келтірмес үшін, қоқысты сұрыптап шықты.

Елнұр Ахметов, Іле-Алатауы ұлттық паркінің бас директоры:

«Таза Қазақстан» акциясы аясы барысында үлкен жұмыстарымыздың бірі – ағаш егу. 47 гектар жерге 139 мыңнан астам ағаш екпелері егіледі. Шрен шыршасын егеміз, ол табиғи түрде де және қосымша екпе көшеттері арқылы да егу жұмыстары, орманды көбейту, толтыру мақсатында отырғызылады.

Айдана Қуантқан