Ұлттық құрылтайдың ІV отырысында қозғалған мәселелердің орындалуын пысықтау үшін Президент кеңесшісі Мәлік Отарбаев Абай облысына арнайы барды. Сапар барысында бірнеше мәдени нысандар мен оқу орындарын аралап, түрлі сала мамандарымен кездесті. Мәлік Отарбаев Абай мемориалдық-қорық музейіне ат басын бұрып, хәкім ескерткішіне гүл шоқтарын қойды. Музей қорында сақталған ақынның мол мұрасымен танысты. Президент кеңесшісі құрылтайда қозғалған өзекті мәселелерді әлеуметтік сала қызметкерлері мен құқық қорғау өкілдерімен талқылады. Мәдениет, тарих, экономика мен заң төңірегінде ой қозғады. Ұлттық құрылтайда көтерілген мәселелер тарихымызды түгендеп, болашаққа нық қадам жасауға мүмкіндік берді. Әлемдегі геосаяси жағдай шатқаяқтап тұрған шақта елдің егемендігін сақтап қалуы аса маңызды. Сондықтан мемлекеттің дамуына мән беріп, тәуелсіздіктің тұғырын биіктету міндеті тұр. Оған әрбір көзі ашық, көкірегі ояу азамат үлес қосуы тиіс, дейді Президент кеңесшісі.

Мәлік Отарбаев, ҚР Президентінің кеңесшісі:

Бүгінгі таңдағы ең үлкен міндет осы. Бүгін ұсақ-түйек мәселеге мән беріп, тырнақ астынан кір іздеп, «Атым шықпаса, жер өрте» дейтін қағидатпен өмір сүретін кез емес. Бүгін ең ірі мәселеге назар аударатын кез. Мемлекетті сақтау және мемлекеттік ұстанымдарға мән беру. Президенттің айтқан әрбір сөзіне мән беру. Және әрбір айтылған сөзді тек қызметтік ұстанымға емес, өмірлік қағидатқа айналдыру.

Ержан Жақып