Рыбакина үшін Ролан Гаррос аяқталды.

Елена польшалық Ига Швёнтекпен кездесіп, ширек финал жолдамасын сарапқа салған.

Жерлесіміз бірінші сетте 6:1 есебімен жеңіске жеткенімен кейінгі сеттерде 3:6 және 5:7 есебімен есе жіберді.

Бес боксшымыз халықаралық турнирде топ жарды

YOUTUBE.COM

Қоржынымызда 12 медаль. Оның бесеуі алтын. Таиланд астанасы Бангкок қаласында бокстан халықаралық турнир мәресіне жетті. Финалдық айқастар көпшілік күткендей аса тартысты болды. Әсіресе 70 келідегі Төрехан Сабырхан өзбекстандық Мұхаммадазизбек Исмойловпен кездесіп, жеңісті жұлып алды деуге болады. Алғашқы раундта төрешілер шешімімен Мұхаммадазизбек алға шыққан. Төрехан қалған қос раундта қарқынын күшейтіп, қарсыласын үздіксіз соққының астына алды. Нәтижесінде 5:0 есебімен жеңіске жетті. Артынша оның жеңіс жолын 80 келідегі Диас Молжігітов жалғады. Ерекшелігі сол дәл осы салмақтың финалында қос қазақ кездесті. Яғни қазақстандық Диас Молжігітов пен Қытай құрамасындағы этникалық қазақ Тоқтарбек Таңатқан жолыққан болатын. Бұл кездесу де өте тартысты болды. Нәтижесінде Диас 4:1 есебімен басым түсіп, ұлттық құрама қоржынына екінші алтынды салды. Әйелдер арасында Виктория Графеева, Наталья Богданова және Елдана Тәліпова өз салмақ дәрежелерінде чемпион атанды. Ал Надежда Рябец пен Гүлсая Ержан финалда ғана қарсыластарына есе жіберіп, күміс жүлде иеленді. Бұған қоса Нұрзат Оңғаров, Нұрсұлтан Алтынбек, Дулат Бекбауов, Бекзат Таңатар және Данияр Рахымбердиев қоланы қанағат тұтты.

Қазақ қыздарының тарихи жетістігі

Тарихи жетістік! Қазақстанның каратэші қыздары әлем үздіктеріне берілетін Grand Winner сыйлығын жеңіп алды. Ерекшелігі сол бұл құрметке алғаш рет екі қазақ қызы ие болып отыр. Яғни 50 келідегі Мөлдір Жаңбырбай мен 61 келідегі Әсел Қанай әлемдік рейтингте көш бастап, жылдың ең үздік спортшылары атанды. Марапттау рәсімі Марокко астанасы Рабат қаласында болды. Түсіндіре кетейік, Grand Winner сыйлығы маусым бойы Премьер Лига кезеңдерінде ең көп ұпай жинаған спортшыларға табысталады. Мөлдір биыл аталмыш жарыстарда үш медаль олжалады. Яғни Мысырда чемпион болса, Қытайда күміс, Францияда қола жүлдегер атанды. Әсел де үш рет жеңіс тұғырына көтерілді. Франция мен Мысырда күміс, Қытайда қола жеңіп алды. Осының арқасында екеуі де Grand Winner сыйлығына лайық деп танылды.

Асқар Молдағали, Қазақстан каратэ федерациясының бас хатшысы

Каратэден балалар арасындағы турнир

Алты аймақтың балалары Ақмола облысына жиналды. Ақмола облысының Щучинск қаласында каратэнің WKF бағыты бойынша Жасталап Санауовты еске алуға арналған турнир өтті. Елімізде осы спорт түрінің негізін салып, оның нық қалыптасуына атсалысқан және қазақ спортшыларын әлемдік деңгейге шығарған тұлғаның есімі ешқашан ұмытылмай, кейінгі толқынға насихатталып тұруы қажет дейді ұйымдастырушылар. Осы мақсатта балалар күні қарсаңында жүздеген өреннің басын қосып, ауқымды жарыс өткізді. Онда 5 жастан 13 жасқа дейінгі балалар бірнеше салмақ дәрежесінде өзара мықтыны анықтады. Алдағы уақытта осындай фоматтағы жарыстарды тқрақты өткізу және ауқымын кеңейту жоспарланып отыр.

Гүлайым Хайролла, Жасталап Санауов атындағы қордың жетекшісі:

- Щучинск қаласындағы спорт кешенінің ерекше тарихы бар. 2020 жылы Жасталап Санауовтың өзі осы жерге уақыт капсуласын салып, алғашқы кірпішін қалаған еді. Енді міне бірінші ірі жарысын қабылдап жатыр. Жалпы бұл жерде 700-ден аса адам тұрақты каратэмен шұғылданады. Оның басым бөлігі, әрине, балалар. Сондықтан салауатты ұлт тәрбиелеуде және болашақ чемпиондарды әзірлеуде үлесі зор деп ойлаймын.